40 ka mga informal settlers nahatagan na ug lote sa proyektong LGU Pabahay IV

NEWS | 2018/12/10 | LKRO

40 ka mga informal settlers nahatagan na ug lote sa proyektong LGU Pabahay IV

SAYONG pamaskong regalo ang nadawat sa 40 ka mga beneficiaries sa 5 ka ektaryang LGU Pabahay project sa Barangay Sudapin, Kidapawan City.

Mismong Si Kidapawan City Mayor Joseph A. Evangelista, ang nanguna sa pagpang apud-apud sa mga luna sa mga residente nga nangandoy nga maka angkon ug lupa aron pabarugan sa ilang mga balay.

Gibana-bana nga mukabat sa 360 ka mga informal settlers ang maka benepisyo sa maong proyekto nga gituyo pang pondo sa City Government aron ilang kabalhinan.

Matud kang Mayor Evangelista, dili na maglisod ang mga mupuyo sa maong lugar, tungod kay sementado naman ang mga dalan sa maong subdibisyon.

Bisan pa gani ang farm to market road, padayon ang pag konkreto niini sa kasamtangan, dungag pa ni Mayor Evangelista.

Gipamulong usab sa mayor nga ang National Housing Authority, nanaad nga ilang I upgrade ang proyekto gikan na sa luna hangtud sa pagpabarog sa mga gambalay.

Lima usab ka mga balay nga pagatukuron sa nasud China, aron mamahimong model house ang ipa draw lots sab sa masuwerte nga beneficiaries.

Gihikutar napud sa City Government ang pagpabutang ug linya sa kuryenti ug tubig pasuod sa maong LGU Pabahay IV, ug ang pagtukod ug water reservoir aron dili na malisdan pa ang mga residente sa maong lugar.

Padayon ang City Planning and Development Office (CPDO), ilawom sa liderato ni Ms. Divina Fuentes, sa pagtuki sa mga dokumento sa uban pang mga informal settlers nga gusto sab maka angkon ug lote sa maong proyekto.

Makumpleto ang pag ayo sa kinatibuk-ang 5 ka ektarya ng proyekto ug ma award na kini sa mga kwalipikadong beneficiaries sa bulan sa Pebrero sa tuig 2019.
Kahinumduman ng ani-agi sa bangag sa dagom ang composite team nga gipamunuan ni Atty. Christopher Cabelin, kauban sila si kanhing Kidapawan chief of police Supt. John Meridel Calinga, Engr. Divina Fuentes, Lorna Morales ug Lu Mayormita, human nga gibi-ay bi-ay sila sa social media sa dihang gipahigayon ang clearing operation.

Bisan si Mayor Evangelista, nakaagom ug mga tumo-tumo, nga kuno iligal ang pagpalit sa city government aron patukuran ug baratong proyekto sa pabahay.

Apan, ang maong mali nga akusasyon wala panumbalinga sa mayor, ug tungod sa iyang liderato, natuman ug napahigayon ang pag develop sa maong luna. (CIO)