Mayor Evangelista nagpahimangno sa pagka alerto sa tanan panahon sa linog 

Mayor Evangelista nagpahimangno sa pagka alerto sa tanan panahon sa linog

KIDAPAWAN CITY – NAGPAHIMANGNO SI CITY MAYOR Joseph Evangelista sa tanan nga mamahimong alerto aron malikayan ang kadaot ug pagka -angol kung ugaling anaay mahitabong linog.
Ang panawagan bunga na usab sa magkasunod nga nahitabong 6.1 magnitude earthquake sa Luzon nga nikutlo sa napulo ug unom ka mga kinabuhi ug pagka-angol sa gatosan nga mga biktima, ug lain pang 6.5 magnitude nga linog sa Eastern Visayas.
Magkasunod nga nahitabo ang mga pagtay-og sa yuta karong semana lamang, butang nga kung diin, nakadala og kabalaka sa katawhan .
Suma pa sa mayor, batasanon unta sa tanan nga susihon ang integridad ug kalig-on sa ilang mga panimalay o establisimento.
Apil sad ang mga koneksyon sa linya sa kuryente hilabi na kay posibleng magdala sa sunog ang mga paglinog ug pagtay-og sa yuta.
Usa pa gikinahanglan nga adunay ‘presence of mind’ ug kaabtik kung ugaling anaay linog.
Gawas pa sa Duck, Cover and Hold nga ginahimo matag linog, kinahanglan nga abtik ang tanan nga maka adto sa mga ‘open spaces’ para malikayan nga mahulogan ug matabunan sa mga debris ug laing butang.