Author: IAN FAMULAGAN

KIDAPAWAN CITY – ( July 10, 2023) Malugod na tinanggap ng abot sa 261 na mga TUPAD beneficiaries mula sa iba’t-ibang mga barangay ang kanilang sahod mula sa City Government. Umabot sa P7,360 ang natanggap na sweldo ng bawat beneficiary o P368 kada araw sa loob ng 20 araw na emergency employment sa ilalim ng TUPAD Program.

Nagtanim ng iba’t-ibang uri ng punongkahoy sa ilalim ng Canopy25 na programa ng City Government ang mga ito, ayon pa sa pamunuan ng Public Employment Services Office o PESO sa ginanap na distribution ng sweldo (July 10, 2023) kung saan ay magka-akibat sa programa ang Department Of Labor and Employment at City Government of Kidapawan.

Malaking tulong ang hatid ng TUPAD o ang Tulong Panghanapbuhay sa Ating mga Displaced/Disadvantaged Workers hindi lamang para sa mga identified beneficiaries na kasali sa programa na magkaroon ng kabuhayan at malaki din ang ang tulong na hatid nito sa pagpo-protekta ng kalikasan. Nakapag-ambag ito sa pangkalahatang planong 2.5 Milyong bilang ng mga puno na itatanim sa ilalim ng Canopy25 Project. ##(CIO)

KIDAPAWAN CITY – (July 7, 2023) 500,000 NA BILANG NG PUNO NA ang naitanim ng City Government at ng partners nito sa ilalim ng Canopy25 na naglalayung mapreserba ang kalikasan at pagkukunan ng tubig maiinom sa lungsod ng Kidapawan.

Positibo si City Mayor Atty. Pao Evangelista na sa nabanggit na dami ng punong itinanim ng City Government at Stakeholders, hindi malalayong makakamit ang inaaasam na 2.5 MIlyong bilang ng puno na target ng Canopy25.

Nakapaloob ang ulat ng alkalde sa Serbisyo at Programa para sa Kalikasan, Disaster Resilience at Climate Change Adaptability Area of Governance sa kanyang State of Our City Address o SOCA.

Pinasalamatan ng alkalde ang lahat ng sumali sa Canopy25 gaya na lamang ng iba’t ibang ahensya ng pamahalaan partikular ang Department of Public Works and Highways, Metro Kidapawan Water District, Energy Development Corporation, CENRO at mga empleyado ng City Government of Kidapawan at ang pribadong sektor.

Naniniwala si Mayor Atty Pao Evangelista na kayang maabot ang minimithing 2.5 Million na bilang puno kung.patuloy na magtutulungan ang lahat para sa kabutihan at kaligtasan ng susunod na henerasyon ng mamamayang Kidapawenyo.

Kapag nakamit ito, tiyak na maitataguyod ang supply ng tubig maiinom, may tahanan ang iba’t ibang nilalang sa kagubatan at ligtas sa epekto ng climate change ang henerasyon sa hinaharap, paliwanag pa ni Mayor Pao Evangelista.##(cio)

KIDAPAWAN CITY – ( July 7, 2023) UMABOT SA mahigit P10 Million Gross Sales o kabuo-an ang kinita at direktang napunta sa mga lokal na magsasaka, mangingisda at mga nagtitinda sa Merkado Kidapawenyo mula buwan ng Marso hanggang sa kasalukuyan.

Inihayag ni City Mayor Atty. Pao Evangelista na bahagi ng area of governance na nakapaloob sa suporta sa mga magsasaka, mangingisda at maliliit na negosyo sa kanyang State of Our City Address o SOCA ang naturang development.

Umani ng positibong reaksyon mula sa publiko ang Merkado Kidapawenyo patunay sa mataas na gradong nakuha ng City Government mula sa pagpapatupad ng programa.

Layunin ng Merkado Kidapawenyo na matulungan ang mga maliliit na magsasaka, mangingisda at negosyante na magbenta ng kanilang produkto kada araw ng Sabado sa kahabaan ng National Highway sa bisinidad ng City Plaza.

Laging dinadagsa ng mga mamimili ng preskong pagkain gaya ng sariwang gulay, prutas, bigas at isda sa Merkado Kidapawenyo dahil bukod pa sa mataas ang kalidad, ay mas mura pa ang halaga ng mga bilihing tampok dito.

Sa halos tatlong buwan na pagsasagawa ng Merkado Kidapawenyo kada araw ng Sabado at sa laki ng kinita ng mga magsasaka, mangingisda at vendors dito, hindi malayong mararating o malalagpasan ang target ng City Government na P20 Million kada taon mula sa matagumpay na pagpapatupad ng programa, pahayag pa ni Mayor Pao Evangelista. ##(cio)

KIDAPAWAN CITY – (July 5, 2023) MAS MAPAPABILIS na ang pagluluwas ng mga produkto ng mga magsasaka ng Purok Durian ng Brgy. Malinan papunta ng merkado matapos isinagawa ang Ground Breaking ceremony para sa road concreting project at reinforced concrete pipe culvert installation with headwall sa lugar.Malaking tulong ito sa kanila, ayon pa kay Malinan Barangay Chair Gemma Pajes dahil aniya, matutugunan na nito ang kanilang hinaing hinggil sa hindi na maayos na daan. Makikinabang dito lalo na ang mga magsasaka sa lugar upang maibenta ang kanilang produkto palabas ng barangay Malinan.Nagkakahalaga ang nasabing proyekto ng abot sa Php 8, 820, 871.00 na nagmula sa 20% Economic Development Fund ng City Government.Sa kanya namang panig, sinabi ni City Mayor Atty Pao Evangelista na sa pamamagitan ng proyekto ito ay inaasahan na mas mapapabilis na ang kalakalan at pagpasok ng kaunlaran sa lugar.Dagdag pa ng alkalde na magpapatupad pa ng iba pang mga proyekto na naglalayung paunlarin ang pamumuhay ng mga residente ng Barangay Malinan.Dumalo sa naturang groundbreaking ceremony sina City Councilors Aljo Cris Dizon, Michael Ablang, at Jason Roy Sibug, Barangay council members ng Malinan at mga department managers ng City LGU.##(cio)

KIDAPAWAN CITY – (July 5, 2023) MATUTUGUNAN na ang kahilingan ng mga residente sa dalawang purok ng Barangay Paco at Balindog na magkaroon ng serbisyong patubig matapos ang isinagawang groundbreaking ng proyektong Ground Water Source Development Project.

Malaki ang benepisyong hatid ng proyekto para mabigyan ng tubig ang mga residente ng Purok Rambutan ng Paco at Purok 2 ng Balindog , ayon pa kay City Mayor Atty Pao Evangelista .

Resulta ng partnership sa pagitan ng City Government of Kidapawan at Metro Kidapawan Water District na kamakailan lang ay pumasok sa isang kasunduan o Memorandum of Agreement na palaguin o idevelop ang mga ground water sources sa lungsod.

Pasasalamat naman ang ipinapaabot ng mga residente sa pamamagitan nina Balindog Chair Angelo Saniel at Paco Chair Edgarlito Elardo sa City Government at MKWD sa pagtugon sa kahilingang magkaroon ng serbisyong patubig ang ilan sa kanilang mga komunidad.

Naisakatuparan ang proyekto mula sa ginawang donation nina Apolinario Pantaleon ng Paco at Jerome at Haydee Amanzio ng Balindog ng kanilang lupa para paglagakan ng proyektong ground water source development.

Nagkakahalaga ng mahigit sa tatlong milyong piso ang bawat proyektong nabanggit na pinondohan ng 20% Economic Development Fund ng City Government.

Maliban kay Mayor Pao Evangelista, dumalo din sa aktibidad sina MKWD General Manager Stella Gonzales, City Councilors Jason Roy Sibug, Mike Ablang at Aljo Cris Dizon, mga barangay officials ng Paco at Balindog, at mga department managers ng City Government of Kidapawan.

Ginanap ang Ground Water Sources Development Project groundbreaking at ceremonial laying of time capsule umaga ng July 5, 2023.##(cio)

KIDAPAWAN CITY – (July 4, 2023) PORMAL NG IBINIGAY NG Office of the Civil Defense ang bagong Regional Evacuation Center (REC) facility sa City Government of Kidapawan.

Mismong si OCD XII Regional Director Gen. Raylindo Aniňon ang nagbigay ng REC kay Kidapawan City Mayor Atty. Pao Evangelista sa Turn-Over Ceremony ng pasilidad ngayong araw ng Martes, July 4, 2023.

Nagkakahalaga ng abot sa P36 Million ang naturang pasilidad na inaasahang magbibigay ng maayos, malinis, ligtas at kapaki-pakinabang na masisilungan ng mga biktima ng kalamidad sa lungsod.

May sarili ng linya ng tubig at kuryente, palikuran, multi purpose covered court at bakod ang REC na matatagpuan sa lupang pag-aari ng City Government sa Barangay Sudapin Kidapawan City.

Naatasan namang magpatayo ng REC ang Department of Public Works and Highways o DPWH.

Sinimulang ipatupad ang proyekto taong 2020 sa panahon ni dating City Mayor at ngayon ay Cotabato 2nd Legislative District Senior Board Member Joseph Evangelista matapos ang mga malalakas na paglindol na nangyari sa lungsod at karatig lugar buwan ng Oktubre 2019.

Maliban kina Mayor Atty Pao Evangelista at OCD XII Regional Director Aniňon, dumalo din sa okasyon sina Atty. Jerano Paulo Pulido na siyang kinatawan ni DPWH XII Regional Director Bashir Ibrahim, Sudapin Brgy Chair John Carl Sibug at kanyang konseho, City Councilors Mike Ablang, Judith Navarra, at Galen Ray Lonzaga, mga department heads ng City Government at mga kawani ng CDRRMO.

Ang City Disaster Risk Reduction and Management Office o CDRRMO ang siyang mangangasiwa sa pagpapatakbo ng nabanggit na pasilidad.

Ibinigay ng OCD XII ang Regional Evacuation Center kasabay ng pagdiriwang ng National Disaster Resilience Month ngayong buwan ng Hulyo.##(CMO/cio)

KIDAPAWAN CITY ( July 3, 2023)- MALAKING PAKINABANG para sa mamamayan ng Kidapawan City pati na sa buong lalawigan ng Cotabato ang abot sa P20 Million na Department of Science and Technology o DOST Building na kasalukuyang itinatayo sa lungsod.

Pinondohan ng Tanggapan ni Cotabato 2nd District Congressman Rudy Caoagdan ang DOST building samantalang nagmula naman sa City Government of Kidapawan ang lupang pinagtayuan nito na matatagpuan malapit sa Farmers Trading Post facility ng City LGU sa barangay Magsaysay at ang Department of Public Works and Highways o DPWH naman ang naatasan na itayo ang gusali.

Maliban kina Kidapawan City Mayor Atty Pao Evangelista at Congressman Caoagdan, panauhing pandangal din sa naturang aktibidad sina DOST Undersecretary Sancho Mabborang, DOST XII Regional Director Engr. Sammy Malawan, Cotabato Governor Emmylou Taliňo – Mendoza, DPWH Cotabato 2nd District Engineer Eliseo Otoc, DPWH Cotabato 2nd District Engineering Office Head of Planning and Design Engr. Marilyn Versola, DOST Provincial Director Michael Mayo, Cotabato Board Members Jomar Cerebo at Ivy Dalumpines at sina Kidapawan City Councilors Rosheil Gantuangco – Zoreta, Jason Roy Sibug at Judith Navarra sa ginanap na Construction Kick Off Ceremony ng gusali kahapon, July 3, 2023. ##(CMO/cio)

KIDAPAWAN CITY (Hunyo 26, 2023) – ABOT sa 62 na mga child laborers o mga batang nagtatrabaho para kumita ang magiging benepisyaryo ng Project Angel Tree sa Lungsod ng Kidapawan.

Mula sa mga barangay ng Indangan at New, Bohol, Kidapawan City ang naturang bilang ng child laborers.

Ang Project Angel Tree ay isang proyekto ng Department of Labor and Employment o DOLE na naglalayong tulungan ang mga batang naghahanap-buhay sa pamamagitan ng pagbibigay ng kanilang mga pangunahing pangangailangan na kanila hiniling o wish mula sa mga sponsors/benefactors.

Kabilang dito ang pagkain, gamit sa eskwelahan tulad mga bag at notebooks, uniporme, sapatos, at iba pa na kanilang isusulat sa papel at isasabit sa isang puno upang makita o mabasa ng mga nais maging “angel” o sponsor/benefactor.

Katuwang ng DOLE sa proyekto ang Public Employment Service Office o PESO ng lungsod sa pangunguna ni Herminia Infanta, PESO Manager kung saan ginawa ang ceremonial hanging of wishes sa City Hall Lobby, alas-otso ng umaga.

Sa naturang pagkakataon ay ipinaliwanag ni DOLE Labor Officer Rica Mae Pipugal ang konsepto ng Project Angel Tree sa harap ng mga konsehal ng lungsod na kinabibilangan nina Rosheil Gantuangco-Zoreta, Jason Roy Sibug, Michael Ervin Ablang, at ABC President at Ex-Officio Morgan Melodias.

Gagawin naman ang distribution of gifts sa July 27, 2023 kung saan aktuwal na ibibigay sa mga child laborers ang kanilang mga kahilingan.

Matatandaang sa mga nakalipas na taon ay nakatulong din na malaki ang Project Angel Tree sa mga batang manggagawa partikular na sa kanilang pag-aaral kung kaya’t umaasa ang kapwa DOLE at PESO Kidapawan na magiging matagumpay din ang aktibidad ngayong taon. (CIO)

Ang Lungsod ng Kidapawan ang siyang host ngayong taon sa gaganaping Run for Resilience o R4R nitong Sabado, July 1 na siyang magiging hudyat ng pagsisimula ng mga aktibidad ng National Disaster Resilience Month para sa taong kasalukuyan ng Rehiyon Dose. Ito ay lalahokan ng mga iba’t ibang Disaster Risk Reduction and Management Councils ng buong rehiyon at ng probinsya at lahat ng mga gustong lumahok at makisaya sa naturang aktibidad. Tinatayang aabot sa taatlong libong mga fun runners ang dadagsa sa Lungsod para sa R4R.

Libre ang pagpapatala o free registration. Maaring magparehistro online sa pamamagitan ng pag click nitong link
https://tinyurl.com/r4rndrm2023 at pwede rin sa mismong araw ng Fun Run na magparehistro. Sa mga on-site registrants ay kailangan lamang pumunta ng alas 4:00 ng madaling araw sa harap ng City hall upang magpatala.

5K at 3K ang event na nakahanda na may kategorya para sa elite, novice, senior citizen at mga kabataan. Tumataginting na P4,000.00 ang premyo plus medalya ang naghihintay para sa Champion ng 5K habang P3,000.00 naman ang cash prize para sa 3K. May premyo rin para sa 2nd at 3rd placers ng lahat ng kategorya. Maari din tingnan lamang ang larawan para sa mga karagdagang detalye.

Ang R4R ay itinatanghal ng Office of the Civil Defense XII, PDRRMO, City Disaster Risk Reduction and Management Council ng Kidapawan at ng Globe Telecom.

Nananawagan naman ang OCD XII at CDRRMO sa lahat ng mga nais lumahok na magpa register na ng online upang iwasang maantala sa mismong araw ng Fun Run.

KIDAPAWAN CITY (Hunyo 23, 2023) – SIYAM na mga asosasyon at kooperatiba mula sa lungsod ang nakabiyaya sa Livelihood Program ng City Government of Kidapawan.

Sa pamamagitan ng City Cooperatives Development Office o CCDO kasama ang Local Economic and Development Investment Promotions Office o LEDIPO at Civil Society Development Unit o CSDU ay nabigyan ng financial assistance o tulong ang mga sumusunod:

Kidapawan Mega Market Vegetable Vendors Association, Inc. (P135,000.00), Kidapawan Mega Market Jambolers Association (P87,000.00), Kidapawenos Food Handlers Association, Inc. (P60,000.00), Kidapawan City Beauty parlors Business Association (P100,000.00), San Roque Farmers Marketing Cooperative (P200,000.00), Kidapawan City United Vendors Credit Cooperative (P200,000.00), Mt. Apo 10 KR Multi-Purpose Cooperative (P200,000.00), Rural Improvement Club Producers Cooperative (P200,000.00), at Stanfilco Kidapawan Consumer Cooperative (P200,000.00)  o kabuoang halaga na P1,382,000.00 na pautang.

Si City Mayor Atty. Jose Paolo M. Evangelista ang nanguna sa ceremonial turn-over of checks na ginanap sa Flag Lowering Ceremony ngayong Biyernes, Hunyo 23, 2023, alas-kuwatro ng hapon.

Sinaksihan ito nina City Cooperative and Development Officer Dometilio B. Bernabe, CSDU Head Atty Levi Jones Tamayo, at mga Konsehal ng Lungsod ng Kidapawan na sina Galen Ray Lonzaga at  Rosheil Gantuangco-Zoreta.

Ayon kay Bernabe, dumaan sa kauukulang proseso ang mga benepisyaryo bago tuluyang natanggap ang ayuda tulad ng project proposal, validation and assessment, at iba pa.

Masaya namang tinanggap ng mga opisyales at miyembro ng nabanggit na mga asosasyon ang naturang ayuda mula sa City Government of Kidapawan na naglalayong makaiwas sa 5-6 na pautang ang mga miyembro at magkaroon sila ng dagdag na puhunan para sa kanilang mga negosyo na unti-unti nilang babayaran.

Kasabay nito ang pangako na gagamitin ng tama ang ayuda at gagawin ang lahat ng makakaya upang mapalago ang kani-kanilang income-generating project. (CIO)