CITY GOVERNMENT, PINURI NG COMMISSION ON HUMAN RIGHTS (CHR) DAHIL SA MGA ADBOKASIYA NITO TUNGKOL SA MGA KARAPATANG PANTAO

NEWS | 2024/01/17 | LKRO

Kidapawan City (January 17, 2024) –Personal na iniabot ni Commission on Human Righs (CHR) Chairperson Richard Palpal-Latoc ang Plaque of Commendation kay City Mayor Atty. Jose Paolo Evangelista sa ginaganap na Lakbay Karapatan Tungo sa Kamalayan (LAKARAN) Barangay Human Rights Action Officers’ (BHRAO) Summit sa City Convention Center kanina.

Ang gawad parangal ay pagkilala sa mga isinusulong na adbokasiya ng administrasyon ng alkalde tungkol sa mga karapatang pantao o human rights sa lungsod, kabilang na dito ang inilabas na Executive Order Number 053 s.2023 na isa sa mga naging basehan ng itinayong City Human Rights Action Center. Gayundin ang paglikha ng City Human Rights Action Team na pinalawig pa sa apatnapung (40) mga barangay ng lungsod.

Sa summit naman ay mas ipinaintindi pa ni Director Atty. Keysie Gomez, ang Officer-In-Charge ng CHR XII at ng kanyang team ang mga mahahalagang konsepto at prinsipyo sa likod ng karapatang pantao upang mas mapalakas pa ito sa komunidad ng mga partisipante, na binubuo ng mga Punong Barangay, BHRAO at iba pang opisyal ng barangay.