NEWS | 2019/04/30 | LKRO
GMA Kapuso Foundation ug army nanghatag ug hinabang sa pamilyang apektado sa hulaw sa Kidapawan
MIKABAT sa 980 gallons sa mga tubig nga mainom ang gipang apud-apud sa mga residente nga apektado sa El Nino Phenomenon sa duha ka mga barangay sa Kidapawan City.
Pinaagi sa GMA Kapuso Foundation ug 901st Infantry Brigade ug 72nd Infantry Battalion sa Philippine Army, gatusan ka mga pamilya sa Barangay Onica ug Amas ang nahatagan ug limpyong tubig mainom, human nga nasinati ang kakulang sa supply sa tubig sa maong mga lugar.
Ayuda kini sa maong mga ahensiya sa LGU Kidapawan, asa sa sulod sa kapin duha ka bulan nagpatigayon ug water rationing sa nasampit nga mga barangay.
Mikabat sab sa 2000 ka mga food packs ang gipang apud-apud sab sa GMA Kapuso Foundation sa tabang sa Philippine Army, sa laing uban pang mga barangay nga nakasinati sa epekto sa hulaw.
Nipaabot sa pasalamat si Mayor Joseph A. Evangelista, sa mga ahensiya nga wala nagpanuko sa pagpaabot ug hinabang sa mga residente nga naapektuhan sa tukmang kainit sa panahon.
Gani ang maong weather phenomenon, nag aghat sa mga opisyal sa lungsod aron ipailawom ang dakbayan sa State of Calamity.
Pinaagi niini magamit sa LGU ang 5% nga Calamity Fund alang sa hinanaling hinabang sa kapin 23, 000 ka mga residente sa 40 ka mga barangay.
Nagsugod na ang pag pang apud-apud ug calamity assistance, asa ang mga naigo sa hulaw makadawat ug tag 11 ka kilo nga bugas, de lata ug noodles.
Subling miapila si Mayor Evangelista sa mga barangay officials ug mga pulitiko nga pasagdan ang Philippine National Red Cross nga maoy manghatag ug hinabang alang sa mga apektadong pamilya. (WAM/CIO)
PHOTOS AND VIDEOS SEE MORE PHOTOS | SEE MORE VIDEOS
