Mga Badjao nga nagapamaligya’g sapatos/bag bawal na nga magdisplay atbang sa mga tindahan – City EEMO

NEWS | 2020/01/16 | LKRO

PRESS RELEASE
January 15, 2020
Mga Badjao nga nagapamaligya’g sapatos/bag bawal na nga magdisplay atbang sa mga tindahan – City EEMO
KIDAPAWAN CITY – DILI na pwede magdisplay ug mamaligya atbang sa mga establisimento sa ilang mga produkto ang mga naga libot-libot nga mga Badjao dinhi sa dakbayan.
Kagahapong adlawa, Enero 14, 2020, gitapok sa mga hingtongdan sa City Economic Enterprise Management Office ang pipila sa mga Badjao nga nagalibot-libot ug nagapamaligya sa ilang mga produktong segunda mano nga mga sapatos ug bag.
Matud pa ni EEMO Head Redentor Real, kini resulta sa mga reklamo sa mga lehitimong gabaligya sa nasampit nga mga produkto batok sa maong mga indibidwal.
Nagreklamo kining mga nanag-iya og pwesto sa ukay-ukay nga sapatos ug bag hilabi na nga gabayad sila og buwis samtang kining mga Badjao wa man gabayad sa City Government.
Dili patas, sigon pa sa mga reklamante, kung mamaligya kining mga Badjao sa ilang kapareho nga produkto atbang sa mga tindahan partikular dinha sa may Sugni Superstore, 7-Eleven convenience shop duol sa Central Warehouse, Sison’s Building kanto sa Dayao Street, kilid sa may Yongson Store, ug sa may Alnaz Store.
Kasagaran sa gabii nagadisplay kining mga Badjao sa ilang mga produkto sa Sugni, Sison’s ug Alnaz panahon nga wala nay Civil Security Unit nga naga roving sa lugar.
Samtang, anaay mga pinili nga adlaw nga magdisplay sila dinha sa 7-Eleven ug Yongson.
Peligroso sa ilaha ug sa publiko sa kinatibuk-an ang safety ang maong mga lugar ug usahay naa pa silay ginauban nga menor de edad, sampit pa sa mga otoridad.
Pagakumpiskahon sa EEMO ang ilang mga baligya kung magpadayon sila taliwala nga naa nay warning gikan sa mga otoridad.
Bawal ang pagpondo pamaligya atbang sa tindahan pero pwede mamaligya kung maglibot-libot lang, suma pa ni Real.##(cio/lkoasay)