Training sa Filipino Sign Language gipahigayon sa Kidapawan

NEWS | 2018/10/04 | LKRO

TRENTA ka mga field workers gikan sa City Social Welfare and Development Office (CSWDO) ang gipa-ilawom sa tulo ka adlaw nga training on Filipino Sign Language, nga gipahigayon sa HOF Mansion Inn, sa Barnagay Balindog milabay Oktubre 2 ngadto na sa petsa 4.

Suportado ni Mayor Joseph A. Evangelista ang maong training, gani ang mayor mismo ang ni-abli sa maong panagtigom ug nihatag sa iyang pagpamulong aron awhagon ang mga ni partisipar nga gamiton ang ilang natun-an para makatabang sa mga igsoong amang ug bungol.

Suod sa tulo ka adlaw, gitudluan ang mga field workers sa CSWDO ug mga nagkadaiyang pamaagi aron makakat-on ug sign language arom magamit pakiglambigit sa mga amang ug bungol sa nagkalainlaing mga barangay.

Apil sa gibansay sa maong training ang alphabet signs, finger spelling, non-manual signs, signs of greetings, signs of days and months ug signs alang sa ilang pamilya ug mga kaigsuonan.

Matud kang Mayor Evangelista, dakong tabang ang maong training aron matagaan ug igong edukasyon pinaagi sa sign languages ang mga igsoong amang ug bungol sa kabarangayan.

Pagkahuman sa maong training, mulogsong ang mga field workers sa 40 ka mga barangay sa dakbayan aron tun an usab ug mga igong sign gestures ang mga lumupyong amang ug bungol, sigon pa ni mayor Evangelista. (City Information Office)