Month: May 2023

KIDAPAWAN CITY (Mayo 24, 2023) – SA kauna-unahang pagkakataon ay gagawin sa Lungsod ng Kidapawan ang “Sugba sa Plaza” bilang highlight ng Culmination Day ng Farmers and Fisherfolks’ Month Celebration sa darating na Mayo 30, 2023.

Abot sa 1,300 kilo ng isdang tilapia o katumbas ng humigit-kumulang 5,200 isdang tilapia ang ilalaan para sa mga lalahok sa “Sugba sa Plaza”.

Handog ito ng City Government of Kidapawan para sa mga mamamayan ng lungsod at para din sa mga mamamayan mula sa ibang bayan, ayon kay Marissa Aton, ang City Agriculturist ng Kidapawan.

Abot naman sa 2,000 tickets ang ihahanda ng kanilang tanggapan para sa pagsasagawa ng aktibidad kung saan bawat ticket ay katumbas ng 1-2 tilapia at 3 packs rice.

Ang pinakamagandang balita naman ay libre o walang bayad ang ticket, ayon pa rin kay Aton.

Maglalaan ng 40 tickets sa bawat barangay na may malalaking populasyon (10 barangays) at ito ay kinabibilangan ng Poblacion, Singao, Sudapin, Lanao, Balindog, Paco, Amas, Nuangan, Manongol, at Magsaysay habang tig 30 tickets naman para sa nalalabing 30 barangays ng lungsod, at meron ding reserved tickets para sa mga walk-in participants at espesyal ng bisita.

Magsisimula ito alas-otso ng umaga sa City Plaza sa nabanggit na araw kung saan by batch ang paraan ng pagpasok (300 persons per batch) at may isang oras na ibibigay para sa pag-ihaw o “sugba” at pagkain ng tilapia.

May mga nakahandang lamesa, grilling units, water supply, at tilapia containers sa loob ng City Plaza.

Labing-limang taong gulang pataas ang maaaring lumahok sa “𝙎𝙪𝙜𝙗𝙖 𝙨𝙖 𝙋𝙡𝙖𝙯𝙖” at kung may mga batang papasok dapat ay kasama ang mga magulang at gagamitin ang kanilang ticket para sa mga bata.

Pinapayuhan din ang mga lalahok sa aktibidad na magdala ng sariling drinking water at pamaypay para sa pag-ihaw ng tilapia.
Layon ng “𝙎𝙪𝙜𝙗𝙖 𝙨𝙖 𝙋𝙡𝙖𝙯𝙖” na maipakita ang masaganang ani ng tilapia sa Lungsod ng Kidapawan at maipabatid hindi lamang sa mga residente ng lungsod kundi pati na sa mga mamamayan mula sa ibang bayan o rehiyon, ayon kay City Mayor Atty. Jose Paolo Evangelista.

Isa rin itong tribute o alay para sa mga local farmers/fisherfolks bilang pasasalamat sa kanilang malaking kontribusyon sa pag-unlad ng agrikultura sa lungsod.

Sa ganitong paraan ay mas lalakas ang market linkage ng tilapia at magbibigay ng daan para sa mga local fisherfolks na magkaroon ng mas malaking benta at kita.

Samantala, maliban sa “Sugba sa Plaza” ay itatampok din ang Inter-School Product Development, Tilapia Cooking Competition, at Product Display (Mega Tent), ayon naman kay Efren Temario, ang Fisheries Coordinator ng OCA.

Kaugnay nito, inaasahang magiging patok sa mamamayan ang aktibidad kung saan makikita ang masaganang ani ng malalaki at malinamnam na tilapia mula sa mga fish pond growers o fisherfolks ng lungsod.

Tema ng pagdiriwang ng Farmers and Fisherfolks’ Month ngayong Mayo 2023 ay “Masaganang Agrikultura, Maunlad na Ekonomiya”. (CIO)

KIDAPAWAN CITY (Mayo 9, 2023) – May dalang panganib ang mga cable wires na nakabitay at nagkabuhol-buhol sa mga poste ng kuryente na makikita sa kahabaan ng national highway at iba pang mga pangunahing kalsada sa lungsod.

Posible itong magsanhi ng aksidente sa mga motorista o kahit sa mga tao na lumalakad o dumadaan lamang sa lugar.
Maliban rito, ay hindi kaaya-ayang tingnan at isang eye sore ang mga nakapulupot, nagkanda-buhol-buhol at halos nalalaglag na mga cable wires.

Kaya naman isang Executive Order ang nilagdaan ni Kidapawan City Mayor Atty Jose Paolo Evangelista para tugunan at bigyan ng solusyon ang problemang ito na matagal ring hindi nabibigyan ng kaukulang pansin.

Sa pamamagitan ng naturang EO ay naatasan ang Office of the City Building Official o OCBO para pangunahan ang pagtatanggal ng mga electrical at cable wires na nagdudulot ng hazard sa tao, mga sasakyan, at iba pang ari-arian.

Kaugnay nito pinaliwanag ni OCBO Head Engr. Jicylle Merin kung ano ang ginagawa ng OCBO personnel ngayon sa highway kaugnay ng kautusang linisin ang mga poste ng kuryente na nagtataglay ng mga dangling cable wires. Ito ay ang massive pullout of dangling wires o mga wires na hindi na ginagamit at tila napabayaan na sa tagal ng panahon.

Ibinahagi din niya ang Executive Order No. 2 series of 2023 na may titulong “An Order Prohibiting the Hazardous Dangling of Wires and Maintenance of Substandard Poles within the City of Kidapawan, Creating an Enforcement Mechanism to Ensure Compliance with Existing Provisions of Law, Directing the Filing of cases Against Violators, and other Related Purposes”, bilang basehan sa pagtatanggal ng mga wires. Ang mga wires ay pag-aari ng ilang mga Telecommunication Companies o Telcos na hindi na functional at tila napabayaan ng nakalambitin sa mga poste.

Kaya naman nitong May 4, 2023 ay sinimulan na ng mga personnel ng OCBO ang pagtatanggal ng mga napabayaang wires upang makaiwas sa aksidente at hind imaging masakit sa mata ang itsura ng mga poste ng kuryente.

Nagkaroon muna ng serye ng pagpupulong sa pagitan ng OCBO, Cotabato Electric Cooeprative, Inc. o COTELCO at ilang mga Telcos para sa pagsasagawa ng massive pullout of dangling wires.
Kinakailangan daw kasi na ma-identify ng tama ang mga tatanggaling wires upang hindi magka-aberya at dito kailangan ang tulong ng COTELCO pati na ang mga natukoy na Telcos.

Binigyang-diin ni Engr. Merin na buong Kidapawan ang target na ikutin ng mga linemen ngunit uunahin muna ang kahabaan ng national highway sa Barangay Poblacion dahil dito naka-concentrate ang mga dangling wires o volume ng mga wires at suriin na rin ang kalagayan ng mga poste ng kuryente at alamin kung ito ba ay nasa mabuting kondisyon pa o kailangan na ring palitan.

Sa kabilang dako, nilinaw ni COTELCO OIC General Manager Crismaceta Golocino na hindi pag-aari ng COTELCO ang mga dangling wires na ito. Katunayan, maraming mga wires na inilagay ang mga Telcos na kailangan ng tanggalin dahil hindi na nga ginagamit o pinakikinabangan kaya naman kailangan ng alisin.

May mga cable wires din raw na maituturing na illegal attachments dahil walang pahintulot ang paglalagay ng mga ito kaya kailangan din isali sa ginagawang massive pullout.

Kapag wala raw Joint Pole Agreement o JPA ang COTELCO at ang alinmang Telco ito ay invalid at ito ang mga illegal attachments, dagdag pa ni GM Golocino.

Sa ngayon ay unti-unti ng natatanggal ang mga cable wires na hindi magandang tingnan at posibleng maging sanhi pa ng malalang aksidente sa national highway partikular na sa harapan ng City Highwalk patungong Jolibee Drive Thru. .

Makakaasa naman ang mga mamamayan na magpapatuloy ang operasyon ng mga personnel mula sa OCBO at COTELCO kasama ang Office of the City Engineer upang unti-unti ay mawala na ang mga dangling wires na dulot ay aksidente ng motorista at iba pang panganib. (CIO)

The Department of Tourism DOT12 Regional Director Nelia R. Arina together with Engr. Armin Hautea, the department’s former Regional Director had a courtesy visit with the City Mayor Atty. Jose Paolo M. Evangelista yesterday, May 22, 2023.

The said visit aims to share the upcoming plans and activities of the region for an unceasing improvement and development of the industry which is sought to help boost the region’s economy and offer more job opportunities.

Kidapawan City’s participation to Treasures of SOX Expo and the DOT’s new banner project launching “Bisita Be My Guest” were the highlighted upcoming activities.

City Mayor Evangelista also invited the DOT 12 officials to come again to Kidapawan City for the upcoming Tilapia Festival and Kasadya sa Timpupo this coming August. Both parties signified its support to the endeavors of its respective agencies for a better SOCCSKSARGEN. (City Tourism and Promotions Office/CIO)

KIDAPAWAN CITY (Mayo 22, 2023) – MALAKI ang posibilidad na papasok ang El Nino Phenomenon sa bansa sa third quarter ng kasalukuyang taon ng 2023.
Ito ay ayon sa Dept. of Science and Technology – Philippine Atmospheric, Geophysical and Astronomical Service Administration o DOST – PAGASA kung saan mahigit 80% ang probabilidad na mararamdaman ito sa buwan ng Hulyo, 2023.
Dahilan naman para ipag-utos ng Department of Interior and Local Government o DILG sa pamamagitan ng mga direktiba sa mga Local Government Units na magkaroon ng mga hakbang o paraan upang hindi gaanong makaapekto ang El Nino o matinding tag-init sa pamumuhay ng mga mamamayan.

𝘼𝙂𝘼𝘿 𝙆𝙐𝙈𝙄𝙇𝙊𝙎 𝘼𝙉𝙂 𝙇𝙂𝙐 𝙆𝙄𝘿𝘼𝙋𝘼𝙒𝘼𝙉

Nitong April 26, 2023 ay naglabas ng forecast at babala ang DOST – PAG-ASA na makakaranas ng El Nino ang malawak na bahagi ng bansa. Ang National Disaster Risk Reduction and Management Council o NDRRMC ay nag-utos sa mga LGUs sa pamamagitan ng mga Regional, City, at Municipal kasama na ang Barangay DRRMOs na magkaroon ng Preparedness Action Plan.

Binigyang-diin ng DOST-PAGASA at NDRRMC ang negatibong dulot ng El Nino (nahati sa tatlong kategorya- Dry Condition, Dry Spell, at Drought) sa agrikultura kaya’t kailangang kumilos agad upang makaiwas sa matinding pinsala at perwisyo.

Agad na tumalima sa kautusang ito ang City Government of Kidapawan sa pangunguna ni City Mayor Atty Jose Paolo Evangelista taglay ang hangaring mapaghandaan ang pagdating ng El Nino.

𝘽𝘼𝙒𝘼𝙏 𝘿𝙀𝙋𝘼𝙍𝙏𝘼𝙈𝙀𝙉𝙏𝙊 𝙈𝘼𝙔 𝙋𝙇𝘼𝙉𝙊 𝙆𝘼𝙔𝘼 𝙀𝙎𝙏𝙍𝘼𝙏𝙀𝙃𝙄𝙔𝘼 𝙉𝘼𝘽𝙐𝙊

Kailangan ng mahusay na estratehiya sa pagbuo ng hakbang para sa pagharap sa El Nino na isang malaking banta sa kaligtasan at kalusugan ng mamamayan.

Kaya naman ang mga pangunahing tanggapan o departamento ng City Government of Kidapawan na kinabibilangan ng Office of the City Agriculturist, Office of the City Veterinarian, City Social Welfare and Development Office, City Health Office at City Nutrition Action Office ay nagsumite ng kani-kanilang plano sa City Disaster Risk Reduction and Management Office o CDRRMO kung paano haharapin ang El Nino.

Nauna nang nagsagawa ng Climate and Disaster Risk Assessment o CDRA ang Lokal na Pamahalaan upang kung saan napag-alamang 14 barangays ang napaloob sa High Vulnerability of El Nino (Red), 15 barangays ang Moderate Vulnerability (Orange), at 11 barangays ang nasa Low Vulnerability (Yellow). Makakatulong ito upang magawa ang nararapat na hakbang para sa bawat grupo o vulnerability ng mga barangay.

Matapos ang pulong ng CDRRM Council ay nabuo ang estratehiyang kinapapalooban ng tatlong bahagi at ito ay ang Early Actions, Anticipatory Actions, at Relief Actions.

𝙈𝙂𝘼 𝙈𝘼𝙃𝘼𝙃𝘼𝙇𝘼𝙂𝘼𝙉𝙂 𝙍𝙀𝙆𝙊𝙈𝙀𝙉𝘿𝘼𝙎𝙔𝙊𝙉 𝙊 𝙍𝙀𝘾𝙊𝙈𝙈𝙀𝙉𝘿𝙀𝘿 𝘾𝙊𝙐𝙍𝙎𝙀𝙎 𝙊𝙁 𝘼𝘾𝙏𝙄𝙊𝙉

Mas maagang pagkilos, mas makakaiwas sa malaking pinsala ng El Nino. Kaya naman bilang bahagi ng Early Actions ay ipinatutupad na ng Office of the City Agriculturist ang malawakang pagtatanim sa bukid ng mga early-yielding root crops kabilang ang kamote, patatas at mga gulay tulad ng okra, talong, kalabasa, kangkong, pechay, lettuce, alugbati at iba pa habang sa palay naman ay kabilang ang mga variety 10, 440 at 538.

Dapat itong gawin maging sa mga bakanteng lote sa mga kabahayan at iba pang lugar na pwedeng mapagtamnan.

Pasok dito ang geographic (cultivation of soil) at hydroponics (water-based) vegetable gardens upang magkaroon ng self-sufficiency at mapatibay ang food supply sa mismong komunidad.
Kabilang din sa aksiyon ang propagation o pagpaparami ng napier grass, “kumpay” at iba pang pagkain para sa livestock.

Pinapayuhan din ang mga magsasaka na ipa-insured ang kanilang mga tanim sa Philippine Crop Insurance Corporation o PCIC sapagkat libre lang naman ito.

Lahat ng nakapaloob sa Early Actions ay ipapabatid sa mga mamamayan sa pamamagitan ng City Information Office o CIO. Tutulong din ang Liga ng mga Barangay sa pagpapakalat ng wastong impormasyon ng pagtatanim para labanan ang masamang dulot ng El Nino.

Palalakasin din ang anti-rabies vaccination sa pangunguna ng Office of the City Veterinarian dahil malaki ang posibilidad na tumaas ang bite incidents sa panahon ng tag-init.

Sa aspeto ng Anticipatory Actions ay partikular na tinitingnan ang kalagayan ng mga marginalized households tulad ng mga rice and corn farmers, rubber tappers, laborers na direktang maapektuhan dahil sa pagkatuyo ng lupain. Sa ganitong sitwasyon ay sila ang unang maapektuhan pati na ang mga tenants, vendors, at iba pang low- income earners.

Bilang paghahanda, sinabi ng CSWDO na kabilang sa kanilang hakbang ang pagbibigay ng pagkain sa mga pamilyang kabilang sa High Risk at ang pondo ay mula sa 70% LDRRMF.

At dahil inaasahan din ang pagtaas ng poisonous animal bites tulad ng snake bites ay palalakasin ang ugnayan sa Anti-Venom Center sa Cotabato Provincial Hospital at posibleng magdagdag ng mga anti-venom.

Ang malawakang aksiyong gagawin ay ang Disaster Relief na magdadala ng ayuda sga apektadong pamilya sakaling umabot ng 60 araw ang tag-init o drought (no rainfall)at sakaling mangyari ito ay magpupulong ang City DRRM Council at i-rekomenda sa Sangguniang Panlungsod ang pagdeklara ng buong Kidapawan City sa ilalim ng State of Calamity.

Sa pagkakataong ito ay bibigyan ng otorisasyon si City Mayor Evangelista na siya ring chairperson ng CDRRMC para magamit ang 30% Quick Response Fund para sa pagtulong sa mga apektadong pamilya alinsunod na rin sa recommendation ng mga concerned offices alinsunod sa El Nino Preparedness Action Plan.

Kaugnay nito, nanawagan si Mayor Evangelista sa bawat sektor na makipagtulungan at ibigay ang buong suporta sa lahat ng hakbang ng local government para sa paparating ng El Nino Phenomenon.

Naniniwala ang alkalde na sa maagang paghahanda, maagap na pagkilos at mga epektibong jhakbang ay makakayang harapin ang El Nino at hindi ganoon kalaki ang magiging pinsala sa mamamayan ng lungsod. (CIO)

KIDAPAWAN CITY (Mayo 20, 2023) – BINUKSAN na ang Luntian Basketball League 2023 – Inter-Barangay Basketball na isa sa pinakaabangang laro tampok ang 40 barangays ng Lungsod ng Kidapawan.

Suot ang kanilang mga uniporme ay nagpasiklaban ang mga koponan ng bawat barangay at nakiisa sa opening program na ginanap sa City Gymnasium, alas-nuebe ng umaga ngayong araw ng Sabado, Mayo 20, 2023.

SI Kidapawan City Mayor Atty. Jose Paolo Evangelista ang nanguna sa formal opening ng naturang basketball league kung saan natuwa siya sa mainit na suporta ng bawat barangay.

Pero bago ang pormal opening, ginawa muna ang ceremonial turn-over ng 40 brand new basketball para sa 40 teams kasama ang kani-kanilang mga Punong-Barangay.

Si Mayor Evangelista ang nag-abot ng bola kasama ang iba pang panauhin na sina Kidapawan City Chief of Police LtCol Peter Pinalgan, Acting City Administrator Janice Garcia, City Councilors Gallen Ray Lonzaga at Jason Roy Sibug, at LGU Sports Coordinator Ramil Deldo.

Sa kanyang mensahe, sinabi ni Mayor Evangelista na sa pamamagitan ng inter-barangay sports ay mapapalakas ang ugnayan ng mga barangay lalo na sa aspeto ng sportsmanship at unity.

Masayang inihayag ng alkalde na tatanggap ng tumataginting na P100,000 cash prize ang magiging champion ng naturang palaro kung saan nagpalakpakan at nagpasalamat ang lahat ng mga players.

Naglaban sa opening game ang kapwa powerhouse team na Barangay Poblacion at Barangay Sudapin kung saan nagwagi ang Barangay Poblacion sa score na 83-75.

Gaganapin naman ang Luntian Basketball League – Inter-Barangay Basketball ’23 bawat Sabado at Linggo hanggang sa sumapit ang kampeonato. (CIO)

KIDAPAWAN CITY (May 20, 2023) – DOBLE ang tinanggap na biyaya ng mga residente ng Lungsod ng Kidapawan na pumila para makabili ng murang bigas mula sa City Government of Kidapawan.
Libreng gupit, libreng manicure, at libreng pedicure ang dagdag na handog sa kanila ni City Mayor Atty. Jose Paolo Evangelista habang pumipila at nag-aantay sa pagbubukas ng outlet ng murang bigas na P20.00 lamang bawat kilo.

Kagabi ay napuno ng sigla ang City Gymnasium matapos na pinapasok doon ang mga residenteng bibili ng murang bigas at ganon na lamang ang kanilang tuwa dahil nag-aantay ang mga libreng serbisyo para sa kanila.

Daaan-daang mga residente ang kinakitaan ng ngiti at saya dahil sino ba naman ang mag-aakala na maliban sa napakababang halaga ng bigas ay may dagdag na benepisyo pa na libreng haircut, manicure at pedicure, dagdag pa ang libreng kape kaya naman sulit ang kanilang pag-aantay.

Samantala, tanging ang Kidapawan City lamang sa buong bansa ang nagawang ibenta ang quality rice sa murang halaga na P20 per kilo na siya namang pangako ng national government sa mamamayan.

Sa pamamagitan ng Executive Order No. 018 series of 2023 ay nilikha ni Mayor Evangelista ang Agri-Trade Fair o mas kilala sa tawag na Merkado Kidapaweno kung saan makakabili ng presko at murang gulay, prutas, isda, at iba pa kabilang na ang quality rice sa murang presyo na P20/kilo.

Laan ito para sa mga Kidapawenos sa harap na rin ng patuloy na pagtaas ng presyo ng pangunahing bilihin sa kasalukuyan.

Layon din nito na mabigyan ng pagkakataon ang mga maliliit na local crops growers na maibenta ang kanilang produkto at maging bahagi sila sa paglago ng lokal na ekonomiya. (CIO/CGSO/KIDCARE)

KIDAPAWAN CITY (Mayo 18, 2023) – NAIPAMAHAGI ang abot sa 1,020 bags ng agricultural salt para sa mga coconut farmers na miyembro ng 27 Small Coconut Farmers Organization o SFCO’s sa Kidapawan City.

Ito ay sa ginawang ceremonial distribution sa Mega Tent kahapon, Mayo 17, 2023, alas-tres ng hapon sa pangunguna ng Office of the City Agriculturist o OCA.

Layon ng pamamahagi ng naturang bilang ng agricultural salt (50 kilos/bag) ay upang mapalaki ang produksiyon ng niyog o increase in coconut yield, ayon pa kay City Agriculturist Marissa Aton.

Bahagi ito ng Food Sufficiency Program ng OCA kung saan katuwang ang mga magsasaka ng niyog sa iba-t-ibang barangay tulad ng Paco, Indangan, Singao, Amazion, Marbel, Sikitan, Balindog at iba pa, ayon pa kay Aton.

Tinungo ni City Mayor Atty Jose Paolo Evangelista ang mga farmer-beneficiaries kung saan nagbigay siya ng mensahe ng suporta at pasasalamat. “𝘐𝘴𝘢 𝘢𝘯𝘨 𝘢𝘨𝘳𝘪𝘬𝘶𝘭𝘵𝘶𝘳𝘢 𝘴𝘢 𝘱𝘪𝘯𝘢𝘨-𝘶𝘶𝘬𝘶𝘭𝘢𝘯 𝘯𝘢𝘵𝘪𝘯 𝘯𝘨 𝘪𝘣𝘢𝘺𝘰𝘯𝘨 𝘱𝘢𝘯𝘴𝘪𝘯 𝘢𝘵 𝘣𝘶𝘰𝘯𝘨 𝘴𝘶𝘱𝘰𝘳𝘵𝘢 𝘢𝘯𝘨 𝘪𝘣𝘪𝘯𝘪𝘣𝘪𝘨𝘢𝘺 𝘯𝘢𝘵𝘪𝘯 𝘴𝘢 𝘮𝘨𝘢 𝘭𝘰𝘤𝘢𝘭 𝘧𝘢𝘳𝘮𝘦𝘳𝘴. 𝘐𝘵𝘰 𝘢𝘺 𝘥𝘢𝘩𝘪𝘭 𝘴𝘢 𝘮𝘢𝘩𝘢𝘭𝘢𝘨𝘢𝘯𝘨 𝘮𝘢𝘱𝘢𝘯𝘢𝘵𝘪𝘭𝘪 𝘢𝘯𝘨 𝘮𝘢𝘩𝘶𝘴𝘢𝘺 𝘯𝘢 𝘧𝘰𝘰𝘥 𝘱𝘳𝘰𝘥𝘶𝘤𝘵𝘪𝘰𝘯 𝘢𝘯𝘥 𝘴𝘶𝘴𝘵𝘢𝘪𝘯𝘢𝘣𝘪𝘭𝘪𝘵𝘺 𝘶𝘱𝘢𝘯𝘨 𝘭𝘢𝘭𝘰𝘯𝘨 𝘭𝘢𝘨𝘪𝘯𝘨 𝘮𝘢𝘴𝘪𝘨𝘭𝘢 𝘢𝘵 𝘮𝘢𝘭𝘶𝘴𝘰𝘨 𝘢𝘯𝘨 𝘱𝘢𝘮𝘢𝘺𝘢𝘯𝘢𝘯”, sinabi ng alkalde.

Ipinahayag din ni Mayor Evangelista na nasa tamang landas na tinatahak ang Lungsod ng Kidapawan pagdating sa mga programa at proyekto kaya naman ginawaran siya bilang Top 6 Best Performing Mayor sa buong bansa (RP Mission and Development Foundation) mula sa 450 lungsod/alkalde sa Pilipinas.

Sa kabila nito, mapagpakumbaba pa ring sinabi ng alkalde na hindi siya ang dapat pasalamatan sa mga tagumpay ng lungsod kundi ang mga mamamayan na buong pusong sumusuporta sa mga programa at proyekto lalo na sa sektor ng agrikultura.
“Hindi pwedeng angkinin ng sinumang politiko o opisyal ng gobyerno ang isang proyekto dahil ang lahat na ipinatutupad na programa ay mula sa buwis na ibinabayad ng mamamayan”, pagdidiin ng alkalde.

Dumalo naman si Joel Dayaday, Presidente ng Small Coconut Farmers Organization – Kidapawan City at siyang nanguna sa pagtanggap ng agricultural salt kasama ang mga miyembro habang nagbigay naman ng pahuling salita o mensahe si Matthew Julius Alcebar, Agricultural Technologist at Coconut Coordinator kung saan pinasalamatan niya si Mayor Evangelista at ang OCA sa makabuluhang proyektong inilaan sa mga magsasaka ng niyog.

Samantala, matapos naman ang ceremonial distribution ng agricultural salt kahapon ay inaasahang magtutuloy-tuloy na ang pamamahagi ng naturang ayuda upang madagdagan pa ang bilang ng mga coconut farmers na matutulungan ng programa. (CIO)

KIDAPAWAN CITY (Mayo 17, 2023) – MASAYANG tinanggap ng mga mamamayan ng Barangay San Isidro sa Lungsod ng Kidapawan ang proyektong Farm to Market Road (FMR) sa Purok 6 at Level 3 water system expansion Purok 1,2 at 3 (installation, interconnection, transfer of 70 units service connection) sa ginanap na formal turn-over ceremony ngayong araw ng Miyerkules, Mayo 17, 2023, ala-una ng hapon.

Pinondohan ng Local Government Support Fund – Support to Barangay Development Program o LGSF-SBDP ng National Task Force to End Local Communist Armed Conflict o NTF-ELCAC ang FMR ng halagang P2M habang ang water system ay pinondohan din ng P2M o kabuoang halaga na P 4M infrastructure projects.

Tulad ng iba pang mga barangay na tumanggap din ng proyekto mula sa LGSF-SBDP, ay mismong si City Mayor Atty Jose Paolo Evangelista ang nanguna sa pagsasalin ng dalawang proyekto mula sa pamahalaan patungo sa kamay ng mga opisyal ng Barangay San Isidro sa pangunguna ni Punong Barangay Dionisio Wanal.

Masaya si Wanal ganundin ang mga residente sa natanggap na mga proyekto na tiyak na pakikinabangan ng barangay kaya’t ipinarating niya ang malaking pasasalamat kay Mayor Evangelista at sa mga ahensiya ng pamahalaan na nagtulungan upang maipatupad ang naturang mga proyekto.

Sa kanyang panig, sinabi ni Mayor Evangelista na ang kapayapaan sa lugar ay ang pinakamahalagang bagay na nakamit ng Barangay San isidro at magtutuloy-tuloy ito sa pamamagitan ng suporta ng bawat isa lalo na sa maayos na pagtanggap at pag-alaga sa proyektong alay ng pamahalaan.

Ang iba pang mga nakiisa at nagbigay ng suporta sa aktibidad ay sina Dept of Interior and Local Government Cotabato Provincial Director Ali Abdullah na nagpahayag na marami pang proyektong ipatutupad ang NTF-ELCAC sa mga barangay, CLGOO Julia Judith Geveso, ABC Federation President Morgan Melodias at mula naman sa City Government ay sina Acting City Administrator Janice Garcia, Budget Officer Alex Pana, PESO Manager Herminia Infanta at MKWD General Manager Stella Gonzales.

Sa hanay naman ng PNP ay dumalo si PCPT Arnold Carillo habang sa AFP ay si 1LT Charles Ian Parel ng 39th IB PA na kapwa nagsabi na ang proyektong tulad ng natanggap ng Barangay San Isidro ay magbibigay daan upang maiwaksi ang insurgency at armadong pakikibaka sa isang lugar at laging nahanda ang kanilang hanay para tumulong sa pagpapatupad ng mga programa at proyekto sa mga barangay. (CIO)

KIDAPAWAN CITY (Mayo 17, 2023) – ISA na namang magandang oportunidad ang ipinagkaloob sa mga local farmers/fish pond raisers sa pamamagitan ng Food Sufficiency Program na ipinatutupad ng Office of the City Agriculturist o OCA.

Ito ay sa ginanap na fingerling distribution sa City Pavilion alas-otso ng umaga ngayong araw na ito ng Miyerkules, Mayo 17, 2023 kung saan abot sa 68 magsasaka mula sa 24 barangays ang nakatanggap ng 120,000 tilapia fingerlings at 25,000 hito fingerlings, ayon kay Marissa Aton, ang City Agriculturist ng Kidapawan.

Ilan sa mga recipients ay mga magsasaka mula sa mga barangay ng Ginatilan, Ilomavis, Kalaisan, Linangkob, Paco, Perez, San Isidro, Manongol, Amazion, Onica, at iba pa na nagpapalago ng fishpond bilang livelihood o pagkakakitaan.

Matapos naman ang distribution ng fingerlings ay sama-sama nagtungo sa Mateo River sa bahagi ng Barangay Perez ang abot sa 30 members ng City Agriculture and Fisheries Council o CAFC, personnel ng OCA, at ilang mga opisyal ng barangay pati ilang residente para sa Balik Sigla sa Ilog at Lawa o BASIL program.

Sa naturang pagkakataon ay nagpakawala sila ng abot sa 10,000 fingerlings ng hito/tilapia bilang bahagi ng pagpapanumbalik ng sigla at mapalakas ang diversity at natural habitat ng ilog ng Mateo.

Una ng isinagawa ng BASIL sa ilog ng Sarayan, Barangay Ginatilan noong Marso 21, 2023 kung saan nagpakawala rin ng maraming fingerlings ang OCA at CAFC sa naturang ilog. (CIO)

KIDAPAWAN CITY (May 16, 2023) – DALAWANG makabuluhang proyekto ang ipinagkaloob sa mga opisyal at mamamayan ng Barangay San Roque sa Lungsod ng Kidapawan.

Kahapon, Mayo 15, 2023 ay ginanap ang formal turn-over ng 64-meter Farm to Market Road concreting project (Purok 4) na nagkakahalaga ng P1M at Level 3 water system (Purok 7- installation of overhead tank, water pump and lay outing of pipes) na nagkakahalaga naman ng P3M laan para sa mamamayan ng Barangay San Roque.

Nagmula sa Local Government Support Fund- Support to Barangay Development Program (LGSF-SBDP) ng National Task Force to End Local Communist Armed Conflict o NTF-ELCAC ang P4M pondong ginamit sa dalawang proyekto.

Tulad ng mga ginawang turn-over sa ibang barangay, si City Mayor Atty Jose Paolo Evangelista ang nanguna sa aktibidad kung saan muli niyang ipinaalala sa mga mamamayan na bigyang halaga at ingatan ang naturang mga proyekto.

Magpapatuloy rin daw ang kanyang administrasyon sa pakikipag-koordinasyon sa mga ahensiya at programa ng gobyerno tulad ng NTF-ELCAC upang maisakatuparan ang mas maraming proyekto sa mga barangay.

Kaugnay nito, pinasalamatan din ni Mayor Evangelista ang kasundaluhan at kapulisan sa pagsisikap ng mga ito na mawala ang insurgency at armadong pakikibaka sa mga barangay.

Layon ng proyekto na maipakita sa mga mamamayan ang lahat ng pagsisikap ng gobyerno upang maiwaksi na ang pakikibaka laban sa pamahalaan at tuluyan ng mawala ang impluwensiya ng insurgency sa lugar.

Lubos naman ang pasasalamat ni San Roque Punong Barangay Simplicia Calvo sa biyayang ipinagkaloob sa kanyang barangay at sinabing malaking pagbabago ang dulot nito lalo na sa mga magsasaka na nagdadala ng produkto palabas ng barangay.
Nakiisa sa okasyon sina City Councilors Michael Earvin Ablang, Jason Roy Sibug, at ABC Kidapawan Federation President Morgan Melodias.

Dumalo rin at nagbigay ng suporta sa aktibidad sina CLGOO Julia Judith Geveso, Acting City Administrator Janice Garcia, City Treasurer Redentor Real, City Budget Officer Alex Pana, City Veterinarian Dr, Eugene Gornez, Francisco Tanaid, Jr. mula sa CGSO, at Assistant Assessor Aurora Abril.

Mula naman sa hanay ng Armed Forces of the Philippines ay dumalo si 1LT Charles Ian Parel mula sa 39th IB PA at sa Philippine National Police naman ay si PCAPT Godofredo Tupas II. (CIO)