Category: Press Release

African Swine Fever Awareness Forum gagawin ng City Government

KIDAPAWAN CITY – PINANAWAGAN NI City Mayor Joseph Evangelista ang lahat ng mga nag-aalaga ng baboy sa lungsod na dumalo sa isasagawang African Swine Fever Awareness Forum sa Setyembre 24, 2019. Layun ng aktibidad na ipagbigay alam sa mga nag-aalaga ng baboy kung ano ang katangian ng AFS at kung papanong maiiwasan ito ng kanilang mga alaga. ‘Pro-active approach’ ng City Government ang aktibidad na nabanggit lalo pa at kinumpirma na mismo ng Department of Agriculture na nakapasok na ang AFS sa bansa. Una ng nagpositibo sa AFS ang labing-apat mula sa dalawampung blood samples ng mga nagkasakit at namatay na baboy sa mga lalawigan ng Bulacan at Rizal, bagay na iniiwasang mangyari ng City Government sa local hog industry ng Kidapawan City. Mangunguna sa AFS Awareness Forum ang Office of the City Veterinarian na gaganapin ala una ng hapon sa Cooperative Development Training Center sa Barangay Magsaysay. Kaugnay nito ay nagsimula na ring kumuha ng blood samples ang OCVET sa ilang babuyan sa Barangay Balindog September 11, 2019. Ipapadala ng OCVET sa Regional Office 12 ng DA sa General Santos City ang mga blood samples para malaman kung may AFS ang mga baboy na nakunan ng dugo. Agad nilang ipapaalam sa mga nag-aalaga ng baboy kung nagpositibo nga ang kanilang alaga sa AFS para maiwasan ang pagkalat at pagkakahawa ng iba pang mga alagang baboy. Nilinaw naman ng otoridad na ligtas kainin ang mga karne ng baboy na ibinibenta sa Mega Market ng lungsod.##(cio/lkoasay)

119TH CSC Anniversary…..City Gov’t officials and employees hinikayat na ibigay ang wastong serbisyo sa taumbayan

KIDAPAWAN CITY – HINIHIKAYAT ni City Mayor Joseph Evangelista ang lahat ng opisyal at kawani ng City Hall na ibigay ang wasto at tamang serbisyo sa taumbayan ayon na rin sa idinidikta ng batas.
Ito ang simplemeng mensahe ng alkalde sa mga bumubuo ng Lokal na Pamahalaan ng Lungsod ng Kidapawan sa pagdiriwang ng 119th Year anniversary ng Civil Service Commission ngayong buwan ng Setyembre.
Sa temang Civil Service at 119: Upholding Integrity and Building a High-Trust Society, umaasa ang publiko sa mga kawani ng gobyerno na makapagbigay ng tamang serbisyo at maayos na pakikitungo sa mamamayan sa lahat ng panahon, wika pa ng alkalde.
Batayan din ang mga probisyong isinasaad ng RA 6713 o Code of Conduct and Ethical Standards for Public Officials and Employees kung saan ay idinidikta nito sa mga opisyal at kawani ng Pamahalaan na umiwas sa ano mang uri ng irregularidad at korupsyon at pagkakaroon ng payak at simpleng pamumuhay na naa-ayon sa batas ng estado.
Pinaka-highlight ng 119th Civil Service Month ay ang paggawad ni Pangulong Rodrigo Duterte sa 2019 Outstanding Government Officials and Employees ng bansa sa isang seremonya na gaganapin sa Malacañang sa September 19, 2019.
Pagkilala sa mahahalagang kontribusyon ng mga opisyal at kawani ng gobyerno sa kanilang pamayanan ang gawad parangal ng CSC.
Taong 2017 ng gawaran ng Pangulo si Ginoong Julito Saladan, Agricultural Technologist ng Kidapawan City Agriculture Office bilang isa sa Pag-asa Awardee ng Outstanding Government Employees ng bansa.
Napili bilang natatanging kawani ng gobyerno si Saladan matapos niyang maimbento ang African Night Crawler ANC Dormitel – isang kagamitan na nagpo-proseso sa mga nabubulok na basura na ginagawang organic fertilizer o compost.

Buong 2019 social pension ibinigay na ng DSWD at City Gov’t sa mga indigent senior citizens

KIDAPAWAN CITY – SINIMULAN NG IBIGAY NG DSWD at ng City Government ang buong taong Social Pension ng may mahigit sa walong libong indigent senior citizens ng lungsod.
P6,000 o katumbas sa P500 na buwanang social pension mula Enero hanggang Disyembre ng 2019 ang natanggap ng bawat senior citizen, ayon pa sa pamunuan ng City Social Welfare and Development Office.
Sinimulang ibigay ang social pension noong September 3 at magpapatuloy hanggang September 6, 2019.
Tumanggap nito ang mga nakatatanda na walang regular pension benefits kagaya ng GSIS at SSS.
Pinapayuhan naman ni City Mayor Joseph Evangelista sa pamamagitan ni City Legal Officer Atty. Jose Paolo Evangelista na panauhing pandangal sa programa bago ang distribution ng ayudang nabanggit, ang mga senior citizen na gamitin ng wasto ang kanilang natanggap na social pension.
Maliban dito ay makakaasa ang mga senior citizen ng dagdag na tulong mula sa City Government at patuloy na suporta sa mga adhikain at programa ng mga nakakatanda, wika pa ng opisyal.
Makakatulong ang social pension sa pambili ng pagkain, maintenance medicine at iba pang pangangailangan ang bawat indigent senior citizen.
Cash at payroll based ang pamimigay ng social pension na ginanap sa City Gymnasium ng lungsod. ##(cio/lkoasay)

October 2020 Barangay SK Elections malamang na di muna matutuloy – Mayor Evangelista

KIDAPAWAN CITY – MALAKI ANG POSIBILIDAD NA hindi muna matutuloy ang October 2020 Barangay/Sangguniang Kabataan Elections. Ito ay ayon na rin kay City Mayor Joseph Evangelista na sinabi mismo sa kanya ni Senator Christopher Lawrence’ Bong’ Go kamakailan lang. Ani pa ng alkalde, sinabi sa kanya ng senador na may inihahandang ng Final Bill sa Kongreso na ipagpaliban muna ang halalan. Layun ng pagpapaliban na mabigyan ng sapat na panahon ang mga Barangay at SK officials na maipatupad ang kanilang mga sinimulang programa. Ibinunyag ng alkalde ang nabanggit na development pagkatapos ang Induction ng labing-anim na mga bagong SK Kagawad ng apat na barangay ng lungsod noong September 2, 2019. Sila yaong mga nanalong SK kagawad sa special elections noong December 2018 at January 2019 na pinangunahan ng Comelec at DILG. Nagmula sa mga barangay ng Singao, Luvimin, Perez at Lanao ang mga bagong SK Kagawad. Sa kabila nito, hinimok pa rin ni Mayor Evangelista ang mga bagong opisyal ng SK na gampanan at gawin ng maayos ang kanilang mga trabaho at responsibilidad. Nakatuon ang payo ng alkalde sa angkop na Liquidation at paggamit ng pondo ng SK, pag-alalay sa mga barangay officials, at paghahanda ng budget. Maliban pa sa P1,000 na honorarium sa SK, may nakalaan din na Special Trainings ang City Government para mabigyan sila ng sapat na kaalaman sa pamamahala at tamang paggamit ng pondo.##(cio/lkoasay) photo caption – MGA BAGONG SK KAGAWAD NANUMPA NA: Ibinigay ni City Legal Office atty. Jose Paolo Evangelista ang Oath of Offices ng mga bagong akgawad ng SK noong Spetember 2, 2019.Personal din silang kinausap ni City amyor Joseph Evangelista sa kung papaano nilang magmpanan ng tama ang kanilang mga responsibilidad at trabaho bilang mag opisyal at lider ng mga kabataan.(cio photo)

Crime Prevention week ginugunita sa lungsod at buong bansa

KIDAPAWAN CITY – HINIMOK NI City Mayor Joseph Evangelista ang lahat na suportahan ang kampanya ng Pamahalaan kontra kriminalidad sa paggunita ng 25th Crime Prevention Week mula September 1- 8, 2019.
Tungkulin ng bawat isa na tumulong sa pagpapanatiling matiwasay at mapayapa ang mga komunidad at protektahan ang sarili na mabiktima ng ano mang uri ng kriminalidad, mensahe pa ng alkalde.
Pinalalakas ng City PNP sa kasalukuyan ang kampanya kontra kriminalidad sa pamamagitan ng kanilang Police-Community Relations program.
Nagbibigay ng panahon ang City PNP na bisitahin ang mga purok, komunidad at barangay upang i-assess ang Peace and Order situation ng mga ito.
Nakikipag-usap din ang mga kagawad ng pulisya sa mga purok leaders at barangay officials para sa pagpapanatili ng kapayapaan at kaayusan sa kanilang mga lugar na nasasakupan.
Payo ng mga otoridad sa lahat na agad ireport ang presensya ng mga masasamang loob sa kanilang lugar sa mga kinauukulan.
Tema ng 25th Crime Prevention week ay “ Buhay Pahalagahan, Komunidad Magtulungan, Krimen Hadlangan,” (cio/lkoasay)

P5,000 multa babayaran ng mga lalabag sa proposed Anti Dengue City Ordinance

KIDAPAWAN CITY – HANGGANG LIMANG LIBONG Piso ang babayarang multa sa City Government ng mga lalabag sa pinaplanong Anti-Dengue City Ordinance.
Nakasaad sa Article VI Section 23 at 24 ng Proposed City ordinance number 19- 043 na pinaplanong ipasa na ng Sangguniang Panlungsod upang masawata ang mataas na bilang ng kaso ng mga nagkakadengue sa Kidapawan City. 
Ang planong ordinansa ay nakikitang pamamaraan ng City Government na himukin ang lahat ng sector na makipagtulungan sa Pamahalaan sa pagresolba sa kaso ng dengue.
Pumalo na sa mahigit anim na raan ang dengue fever cases mula Enero hanggang Agosto na may naitalang dalawang namatay.
235% ang itinaas nito kumpara sa kaparehong panahon noong 2018.
Ilan lamang sa itinuturing na violation sa nabanggit na ordinansa ang mga sumusunod: pag-iimbak ng mga lumang gulong, baterya, plastic, bote o alin mang uri ng sisidlan ng tubig na pwedeng pamahayan ng mga lamok at kiti-kiti; pag-iimbak ng mga lalagyan na hindi natatakpan ng maayos lalo na sa mga vulcanizing at battery repair shops at hindi pagpayag ng mga nagmamay-ari ng mga bakanteng lote na pwedeng tirhan ng mga lamok na linisin ng mga kinauukulan o komunidad, ayon pa sa SP Committee on Health na siyang may-akda at nagsusulong sa City Anti Dengue Ordinance.
Pinagbabawal din ang hindi pagkilos ng mga itatatag na mga City Anti Dengue Brigades sa problema ng dengue at pagsira sa mga education at information materials kontra dengue na ipoposte sa mga barangay, ayon pa sa Ordinansa.
Iniimbitahan ni City Mayor Joseph Evangelista at ng Sangguniang Panlungsod ang publiko sa September 9, 2019 ganap na ala una ng hapon kung saan ay gagawin ang Public Hearing para pag-usapan ang Proposed City Anti Dengue Ordinance sa City Cooperative Learning Center sa Barangay Magsaysay.
Target ng SP na maipasa na ang Anti Dengue Ordinance bago pa man matapos ang taong kasalukuyan.##(cio/lkoasay)

OCVET nakabantay sa posibleng pagpasok ng African Swine Fever sa lungsod

KIDAPAWAN CITY – NAKABANTAY ANG City Veterinarian’s Office sa posibleng mangyaring kaso ng African Swine Fever sa mga babuyan sa lungsod.
Reaksyon ito ni City Veterinarian Dr. Eugene Gornez sa kaso ng mga namamatay na mga baboy sa iba’t-ibang bahagi ng bansa sa kasalukuyan. 
Bagamat hindi pa matukoy ng mga otoridad kung African Swine Fever nga ang rason sa pagkamatay ng mga baboy, nakabantay ang kanyang opisina sa posibleng pagpasok nito sa lungsod.
Pinapayuhan ng OCVET ang mga nag-aalaga ng baboy sa mga kabaranggayan na agad sumangguni sa kanilang mga Barangay Animal Health Workers kung sakaling magpakita ng simtomas ang kanilang mga alaga.
Ito ay kinabibilangan ng mga sumusunod: lagnat; panghihina at kawalan ng gana sa pagkain; pamumula ng balat partikular ang tainga at nguso; ubo at hirap sa paghinga; pagsusuka at diarrhea na may kasamang pagdurugo, at biglaang pagkalaglag ng mga ibinubuntis na biik.
Kapag nagpakita ng mga simtomas na nabanggit ang mga baboy, agad itong ireport sa mga kinauukulan, wika pa ng OCVET.
Pinapayuhan din ang mga nag-aalaga ng baboy sa wastong pangangalaga tulad na lamang ng palagi-ang paglilinis ng mga kulungan upang maiwasan na magkasakit ang mga ito. ##(cio/lkoasay)

Mayor Evangelista nilalakad na ang paglalagay ng sangay ng DFA sa lungsod

KIDAPAWAN CITY – NILALAKAD NA NI City Mayor Joseph Evangelista ang paglalagay ng opisina ng Department of Foreign Affairs sa lungsod.
Layun ng plano na makapagbigay ng agarang tulong sa mga Overseas Filipino Workers at yung mga nagnanais makakuha ng pasaporte na taga Kidapawan City at karatig lugar. 
Ito ay matagal ng pinaplano ng alkalde matapos ang matagumpay na paglalagay ng mga Satellite Offices ng Pamahalaan partikular ang National Bureau of Investigation at Professional Regulations Commission sa Kidapawan City.
Kapwa matatagpuan ang mga nabanggit sa City Overland Terminal ng lungsod.
Upang makakuha ng suporta sa planong ito, lumapit mismo si Mayor Evangelista kay Senate President Vicente Sotto III at Senator Manuel ‘Lito’ Lapid noong nakaraang linggo.
Hiniling ng alkalde ang suporta ng dalawang butihing mga senador upang maisakatuparan ang paglalagay ng sangay ng ahensya.
Maliban sa pagbibigay serbisyo sa mga OFW’s at pagpo-proseso ng pasaporte, mas magiging madali na lang para sa mga kapamilya ng mga distressed OFW’s na may problema sa ibang bansa na matulungan ng Pamahalaan sa pamamagitan ng DFA.##(cio/lkoasay)

City Gov’t gagawaran bilang National Kabalikat Awardee ng TESDA

KIDAPAWAN CITY – GAGAWARAN BILANG National Kabalikat Award ng Technical Education and Skills Development Authority ang Kidapawan City Government.
Ito ay bilang pagkilala ng TESDA sa adbokasiya at suporta ng City Government sa Technical Vocational Education and Training o TVET Program ng ahensya. 
Tatanggapin ng City Government ang parangal sa ilalim ng Local Government Unit Category mula sa TESDA sa August 30, 2019 sa TESDA Auditorium sa Taguig City.
Kinilala ng TESDA ang mga programa ng City Government na naglalayung mabigyan ng skills training para magkaroon ng kabuhayan ang maraming beneficiaries ng programa.
Sa tulong ng TESDA, nakipagpartner si City Mayor Joseph Evangelista sa pribado at government sector upang maisakatuparan ang programa sa skills development at livelihood ng mga beneficiaries.
Ilan lamang sa mga programang ito ay kinabibilangan ng: e-learning System kabalikat ang DepEd at With Love Jan Foundation at Jobstart Program katuwang ang Department of Labor and Employment at mga pribadong kompanya.
Marami na ang nakabenepisyo sa programang nabanggit dahil bukod pa sa pagkakaroon ng skills development at employment sa loob at labas ng bansa, ay nabigyan din sila ng informal education sa pamamagitan ng programa.
Ang pagbibigay parangal ay bahagi ng ika dalawampu at limang taong anibersaryo ng TESDA na ginugunita sa buwan ng Agosto kada taon.##(cio/lkoasay)