February 1, 2021
ADOPTION NG MGA NAHULING STRAY DOGS NG OCVET PINAPAYAGAN NA NG CITY GOVERNMENT
KIDAPAWAN CITY – PINAPAYAGAN NA NG City Government ang pag-aampon ng mga asong gala mula sa City Dog Pound ngayong 2021.
Sa pamamagitan ng Executive Order number 001 s. 2021 na nilagdaan at inilabas kamakailan lang ni City Mayor Joseph Evangelista, pwede ng mag-ampon ang mga nagnanais mag-alaga ng aso mula sa mga nahuling stray dogs ng City Veterinary Office.
Ito ang sinabi ni Dr. Elaine May Mahusay, Veterinarian II ng OCVET sa programa ng City Government sa himpilan ng radyo nitong January 29.
Aniya, pamamaraan ito ng City Government na mabigyan ng tamang pangangalaga ang mga asong gala na nasa dog pound ng OCVET.
Hinuhuli ng mga kagawad ng OCVET ang mga asong gala sa iba’t-ibang lugar ng lungsod bilang pamamaraan na hindi ito makapangagat at makaperwisyo sa iba at makontrol ang pagkalat ng nakamamatay na rabies sa mga komunidad.
May pito hanggang sampung araw na binibigay na palugit sa mga may-ari ang OCVET para tubosin ang kanilang alaga.
Sa mga nagnanais umampon ng aso, mangyaring makipag ugnayan lamang sa OCVET.
Bago pa man ang adoption, dadaan muna sa kaukulang proseso ang mag-aampon upang malaman kung sapat ba ang kanyang kakayahan na mag-adopt, maliban pa sa mga screening at interview na kalakip dito.
Dadaan sa Responsible Pet Ownership ang mag-aampon. May Application Form siya na dapat I fill-up na kasali sa proseso.
Kung pumasa sa screening at interview, saka pa lamang niya personal na makikita ang asong aamponin.
Pipirma sa Affidavit of Undertaking ang mag-aampon at ang City Government kung saan ay nakasaad dito ang mga dapat sundin ng bagong may-ari.
Tanging impounding fee ng aso ang babayaran ng bagong may-ari bago ang adoption.
Imo-monitor ng OCVET ang asong inampon at obligado ang bagong may-ari na magsumite ng progress report sa kalagayan ng aso.
Hihimukin ni Mayor Evangelista ang Sangguniang Panlungsod na magpasa ng Ordinansa para sa adoption ng mga aso. ##(CIO/JPE)
February 1, 2021
MAHIGIT LIMANG LIBONG EMERGENCY MEDICAL SERVICES NATUGUNAN NG CITY CALL 911 PARA SA TAONG 2020
KIDAPAWAN CITY – 5,733 NA EMERGENCY MEDICAL SERVICES ang nabigyang katugunan ng Kidapawan City Call 911 para sa taong 2020.
Nakapaloob sa 2020 Accomplishment Report ang nabanggit na kabuo-ang bilang ng nabigyang serbisyo ng City Call 911.
Kalakip dito ang 24/7 ambulance services sa panahon ng mga aksidente, medical emergency at OB cases, at request for medical transportation sa labas ng lungsod at karatig lugar.
Nasa ilalim ng supervision ng City Disaster Risk Reduction and Management Office o CDRRMO ang City Call 911 na mahalagang kabahagi ng Public Safety at Peace and Order Program ni City Mayor Joseph Evangelista.
Bagamat at naging malaking hamon para sa lahat ang Covid19 pandemic, ipinaseguro ng City Government na 24/7 ang serbisyong ibibigay nito sa pamamagitan ng Call 911 sa mga Kidapawenyo.
Katunayan, aktibong taga pagpatupad ng mga Covid19 protocols ang Call 911 sa tulong ng CESU lalo na yaong nangangailangan ng ambulance services patungo sa mga Temporary Treatment at Isolation Facilities.
Sinusundo rin ng ambulansya ng Call 911 pahatid sa kanilang mga tahanan yaong mga gumaling na na mga pasyente ng Covid19.
Tiniyak naman ni Mayor Evangelista ang mismong kaligtasan ng mga kagawad ng Call 911 sa pamamagitan ng paglalaan ng mga Personal Protective Equipment at iba pang kagamitan tuwing mae-exposed sa mga pasyenteng suspected o confirmed Covid19 cases.
May angkop din na communication system na inilaan ang City Government para sa agarang pagtugon ng mga kagawad ng Call 911 sa panahon ng emergency.
Ang Kidapawan City Call 911 ay isa sa dalawang 24/7 Call 911 services sa buong Pilipinas maliban pa sa Davao City.
Ito ay itinatag ni Mayor Evangelista at nagsimulang mag-operate noong September 11, 2013.##(CIO/JPE)
January 27, 2021
KADIWA NI ATE AT KUYA GAGAWIN SA LUNGSOD SA JANUARY 29, 2021
KIDAPAWAN CITY – SA LAYUNING MAKATULONG SA MGA CONSUMERS na apektado ng nagpapatuloy na pagtaas ng halaga ng produktong pagkain, muling isasagawa ng Department of Agriculture at City Government ang KADIWA NI ATE AT KUYA sa January 29, 2021 araw ng Biyernes.
Magiging venue ng aktibidad ang Pavilion ng City Plaza ng lungsod.
Ito ay pantawid pansamantala na inisyatibo ng City Government upang maibsan ang problema ng mga mamimili sa mataas na presyo ng karne, isda, poultry at ng iba’t ibang klase ng gulay.
Matatandaang unang ginawa ang KADIWA buwan ng Abril 2020 bilang isa sa mga pamamaraan na mabigyang oportunidad ang mga mamamayang hindi basta basta makalabas ng tahanan dahil sa peligrong dulot ng Covid19 pandemic.
Pangungunahan ni City Mayor Joseph Evangelista at mga kawani ng DA XII ang pagbubukas ng KADIWA ganap na alas siyete ng umaga hanggang alas dos ng hapon sa nabanggit na petsa.
Mga regional at local producers and farmers ang magbebenta ng kanilang produktong karne ng baboy, baka, manok, isda, at iba’t ibang klase ng gulay, prutas, at iba pang sariwa at prosesong pagkain sa lugar sa presyong abot kaya ng buying public.
“Kumpara noong KADIWA last April 2020, mas maraming produktong karne ang ibebenta ngayong January 29, 2021”, pahayag pa ni City Agriculturist Marissa Aton.
Tulad ng nakagawian, kinakailangan pa ring sumunod ang mga mamimili sa mga nakasaad na minimum health protocols gaya ng pagsusuot ng face mask at face shields, physical distancing, thermal scanning at disinfection habang bibili sa KADIWA.
Kaugnay nito, sa kabila ng mataas na presyo, ipinababatid ng City Government sa pamamagitan ng City Agriculture Office na sapat ang supply ng pagkain sa lungsod.##(CIO)
January 26, 2021
BANANA FARMERS NG LUNGSOD NAGPASALAMAT SA TULONG NG CITY GOVERNMENT, LOCAL FOOD SUFFICIENCY ISINUSULONG NG LOKAL NA PAMAHALAAN
KIDAPAWAN CITY – NAGPASALAMAT ANG MGA MAGSASAKA ng saging sa lungsod sa pagbibigay solusyon sa kanilang problema sa tamang bentahan ng kanilang produkto.
Ito ang ipinapaabot ng mga banana farmers na mga kasapi ng Mua-an Farmers and Producers Multi-Purpose Cooperative matapos nilang matanggap ang isang bagong Fuso Hauling Truck mula sa Lokal na Pamahalaan nitong January 26, 2021.
Ito ay pinondohan kapwa ng City Government at ng Philippine Rural Development Project ng Department of Agriculture na naglalayung mai-angat ang kabuhayan ng mga magsasaka, magbigay ng angkop na kaalaman at teknolohiya upang mas lumago ang ani, at magkaroon ng pangmatagalan at epektibong sistema ng pagsasaka na makaka-agapay sa climate change.
“ Ang mga bagong truck ay makakatulong hindi lamang sa ating mga magsasaka na maipagbili ang kanilang ani. Tulong din ito sa ating local food sufficiency. May inilaan tayong Php 76 Million para palaguin ang agrikultura, fisheries livestock etc. Sa pamamagitan nito ay may sapat tayong pagkain sa panahon ng kalamidad. Ipinaseseguro ng inyong City Government na sa pamamagitan ng programa, hindi magugutom ang bawat Kidapawenyo”, pahayag pa ni City Mayor Joseph Evangelista kung saan ay pinangunahan niya ang turn-over ng bagong Hauling Truck.
Ang bagong truck ay isa lamang sa tatlong sasakyan na siyang commitment ng City Government sa pagtulong sa mga magsasaka na maibenta ang kanilang ani.
Nakatakdang bumili ng mga refrigerated vans ang City Government ngayong taon para maitago at maibenta ang mga produktong karne, poultry, preskong isda at mga gulay ng mga magsasaka mula sa Kidapawan City patungo sa malalaking pamilihan sa iba’t-ibang bahagi ng bansa.
Makakatulong ito lalo na sa mga maliliit na magsasaka na direktang apektado sa limitadong marketing opportunities dala ng Covid19 pandemic. ##(CIO)
January 22, 2021
KIDAPAWAN CITY 3RD MOST COMPETITIVE COMPONENT CITY NG MINDANAO SA TAONG 2020 – DTI
KIDAPAWAN CITY – MAAYOS NA PAMAMAHALA AT EPEKTIBONG PAGBIBIGAY SERBISYO PUBLIKO PARA SA LAHAT.
Ganito mailalarawan ni City Mayor Joseph Evangelista ang pagkakahirang ng Kidapawan City bilang 3rd Most Competitive Component City in Mindanao ng Department of Trade and Industry para sa taong 2020.
Sa kabila ng naranasang 2019 earthquake at ang nagpapatuloy na krisis na dala ng Covid19 pandemic, nananatiling maayos at kapaki-pakinabang ang mga programa at serbisyong hatid ng City Government sa mamamayan, at pag-unlad ng lungsod.
“This recognition is for all of the Kidapawenyos. Your City Government will always do its best to serve and roll out programs that will be beneficial for all”, pahayag pa ni Mayor Evangelista.
Sukatan nito ang mga sumusunod: economic dynamism, government efficiency, infrastructure, and resiliency na mga pangunahing criteria para maging isang competitive city.
Tuloy ang pagbibigay ng regular na serbisyo publiko at naipatutupad ng wasto ang mga proyekto ng City Government sa panahon ng Covid19.
Nanatiling matatag ang iba pang serbisyo gaya ng health at emergency medical response, public safety, social services, at education programs ng City Government noong 2020 kahit pa naging limitado ito sa simula dahil na rin sa naranasang krisis na dulot ng Covid19.
Sa usaping pang ekonomiya, nananatiling masigla ang maraming negosyo sa lungsod sa kabila ng pandemya.
Nagpapatuloy din ang mga proyektong pang-imprastraktura hindi lamang sa mga proyektong ginagawa ng City Government, kungdi, kapansin-pansin din ang pagtatayo ng mga bagong gusaling pang negosyo sa sentro at mga barangay ng lungsod.
Pumangatlo ang lungsod sa 27 na mga component cities ng Mindanao ayon pa sa inilabas ng DTI kamakailan lang.
Sinundan ng Kidapawan City sa Component Cities category ang mga lungsod ng Tagum at Cotabato na siyang nasa una at pangalawang pwesto habang nasa ikaapat na pwesto ang Panabo City Davao Del Norte at Pagadian City Zamboanga Del Sur. ##(CIO)
January 19, 2021
BUDGET NA PAMBILI NG COVID19 VACCINES APRUBADO NA NG SANGGUNIANG PANLUNGSOD
KIDAPAWAN CITY – APRUBADO NA SA Sangguniang Panlungsod ang pagdedeklara ng State of Calamity at paggamit ng 30% Quick Response Fund ng CDRRMO para makabili na ng kinakailangang bakuna kontra Covid19.
Una ng umapela sa mga miyembro ng konseho si City Mayor Joseph Evangelista sa isinagawang special session nitong umaga, upang hilingin ang pag-aapruba ng Resolution numbers 1, 2 and 3 s, 2021 ng CDRRMC.
Resource peson sa nabanggit na special session ang alkalde kung saan ay ipinaliwanag niya ng lubusan ang kahalagahan ng pagbili ng Covid19 vaccines na abot sa Php 28 Million ang inilaang pondo ng City Government na pambili nito.
“ Any second that we delay the purchase of vaccine is endangering the lives of our people. That we cannot afford.”, apela pa ni Mayor Evangelista sa SP.
Tanging bakuna na aprubado ng Department of Health, Bureau of Food and Drug Administration at ng National Inter Agency Task Force on Covid19 at may 70% efficacy rate pataas ang bibilhin ng City Government, pagtitiyak pa ni Mayor Evangelista.
45,901 ang target na mabakunahan sa ilalim ng plano ng City Government.
Pinangunahan ni SP Committee Chair on Legal Matters and Good Governance Chair Melvin Lamata, Jr bilang Presiding Officer ang Special Session dahil na rin sa hindi pagsipot ni City Vice Mayor Jivy Roe Bombeo.
Kumpleto din ang presensya ng lahat ng mga konsehal maliban na lang kay City Councilor Ruby Padilla – Sison.
Sa isang Executive Order number 007 s. 2021 na inilabas ni Mayor Evangelista ngayong araw, may inilatag na na programa at sistema ng pagbabakuna ang City Government upang masegurong maipapatupad ng tama ang vaccination.
Ayon pa sa alkalde, maliban pa sa mga frontliners plano ring isali sa bibigyan ng bakuna ang mga senior citizens, mga tricycle at habal habal drivers, mga nagtitinda sa Mega Market, kagawad ng media, at public school teachers.
Maliban kasi na madaling mahawaan ng sakit ang mga nakakatanda, ang ibang mga nabanggit na targeted sectors ay ‘ regular na nakikisalamuha sa tao, kaya at posibleng mahawaan ng sakit’.
Tripartite ang magiging sistema ng pagbili ng bakuna dahil pipirma sa isang kasunduan ang DOH/IATF para sa National Government, ang mismong Pharmaceutical company na magsu-supply ng bakuna at ang City Government.
Kaya at dapat ng kumilos ang City Government na maaprubahan ang pagbili ng bakuna lalo pa at nagkukumahog at nag-uunahan na ang iba pang Local Government Units sa bansa na makabili ng Covid19 vaccines, ani pa ni Mayor Evangelista.## (CIO/JPE/lkro)
224 INDIGENT BENEFICIARIES TUMANGGAP NG TULONG PANGKABUHAYAN MULA SA DOLE AT CITY GOV’T
KIDAPAWAN CITY – DALAWANG DAAN AT DALAWAMPU’T APAT NA MGA indigent beneficiaries ang tumanggap ng kani-kanilang Livelihood Starter Kits mula sa City Government at Department of Labor and Employment nitong nakalipas na January 14, 2021.
Pinondohan ng DOLE sa pamamagitan ng DOLE Integrated Livelihood Program o DILP at ng City Government ang tulong pangkabuhayan ng nasabing bilang ng mga benepisyaryo ng programa.
Layun nito na makatulong na magkaroon ng pagkakakitaan ang mga mahihirap na mamamayan na lubos na naapektuhan ng Covid19 pandemic.
Sila yaong mga dumaan sa validation mula sa kanilang mga barangay officials at Public Employment Services Office ng City Government na lubos na nangangailangan ng tulong pangkabuhayan.
Marami sa kanila ang una ng nawalan ng regular na kita matapos ang pananalasa ng pandemya noon pang March 2020.
Pangalawa na ito sa mga tulong kabuhayan sa ilalim ng DILP na ibinibigay ng DOLE at City Government kung saan ay nakapagbigay ng paunang livelihood assistance buwan ng Nobyembre noong nakalipas na taon.
Mga kagamitan para sa: maliit na karinderya; bakery, pagluluto at paglalako ng pritong manok, balut at kakanin; barber shop at cosmetology gaya ng manicure at pedicure ang ilan lamang sa mga tulong pangkabuhayan na natanggap ng mga beneficiaries na nagmula pa sa iba’t-ibang barangay ng lungsod.
Ginawa ito upang agad makapagsimula ng maliit na negosyo ang mga beneficiaries, kapwa tugon pa ng DOLE at PESO na kapwa nangasiwa sa pagbibigay ng ayuda sa petsang nabanggit sa Mega Tent ng City Hall.
Bagamat at libre ang tulong, hinikayat naman kapwa ng DOLE at City Government na palaguin ng mga beneficiaries ang kanilang maliit na negosyo dahil bukod pa sa kikita sila mula rito, ay mas madali na rin silang makatangap ng iba pang ayudang magmumula sa Pamahalaan. ##(CIO/JPE/lkro)
photo credit to Ms. Jvy B. CAlunsag of PESO Kidapawan
January 18, 2021
Php76 MILLION SUPPORT TO AGRICULTURE PROGRAM, IPATUTUPAD NG CITY GOVERNMENT NGAYONG 2021
KIDAPAWAN CITY – PAGTULONG SA KABUHAYAN NG MGA magsasaka sa lungsod ang pangunahing dahilan sa pagpapatupad ng mahigit sa Php 76 Million Support to Agriculture ng City Government.
Una na itong sinabi ni City Mayor Joseph Evangelista matapos ang pag-aapruba ng mahigit sa Php1 Billion annual budget ng City Government para sa taong 2021.
Sa pamamagitan ng programa, mabibigyan ng pagkakataon ang mga magsasaka ng gulay, prutas, mais at palay, cutflowers, maging mga tilapia at freshwater fish producers at livestock, poultry growers na maibenta ng tama at sa saktong halaga ang kanilang mga produkto.
Ibibigay ng City Government ang nararapat na farm inputs para magamit ng mga magsasaka.
Gagawin ito sa pamamagitan ng isang Memorandum of Agreement sa pagitan ng City Government at ng farmer sector upang masegurong magiging produktibo ang farm inputs gaya ng seeds, fertilizers, at iba pang gamit pang agrikultura.
Bibilhin ng City Government ang ani ng mga farmers sa kalaunan sa ‘current farm gate prices’ para masegurong sapat ang kikitain ng mga magsasaka.
Ang City Government na ang magbebenta ng mga produktong agrikulturang nagmula sa mga taniman ng lungsod sa ibang lugar, ayon pa kay City Agriculturist Marissa Aton.
Upang maisakatuparan ito, bibili ng backhoe ang City Government na eksklusibong gagamitin lamang sa paghuhukay ng mga fishponds; 3 units ng refrigerated vans para maibyahe ang mga produktong gulay, cutflowers, prutas, preskong isda at karne, pagpapatayo ng mga feed mills para sa poultry at livestock production.
Kalakip din ang produksiyon ng mga sumusunod: bigas at mais, gulay, prutas lalo na ng Pomelo at Kalamansi; cutflowers, tilapia, livestock and poultry.
Magpapatupad din ng dagdag na Demo Farms na kapapalooban ng Greenhouses at Hydrophonic facilities, Tilapia Breeding Stations at Dairy and Free Range Chicken Production.
Sa second quarter ng taong kasalukuyan ay target ng masisimulan ang pagpapatupad ng mga nabanggit, pagtataya pa ng City Agriculture Office.##(CIO/JPE/lkro)
January 13, 2021
MAYOR EVANGELISTA NAGPASALAMAT KAY PANGULONG DUTERTE SA P15 MILLION ‘GREEN, GREEN, GREEN’ PROJECT SA CENTER ISLANDS NG LUNGSOD
KIDAPAWAN CITY – PASASALAMAT ANG IPINAPAABOT NI City Mayor Joseph Evangelista kay Pangulong Rodrigo Duterte sa pagbibigay ng P15 Million na pondo para sa pagsasaayos at pagpapaganda ng may tatlong kilometrong bahagi ng Center Islands sa Quezon Boulevard.
“ In behalf of the people of Kidapawan City, our heartfelt thanks to President Duterte through the Department of Budget and Management for allocating the funds for the rehabilitation and beautification of our center islands, which we consider an iconic landmark of the city.”, pahayag pasasalamat ng alkalde sa Pangulo ng bansa.
Ang ‘Green, Green, Green” Program na bahagi naman ng Build, Build, Build Massive Infrastructure Development program ng Duterte administration.
Ang Center Islands ang napili ng City Government na proyekto dahil ito ay maituturing na iconic landmark ng lungsod at madaling marating o accessible para sa mamamayan.
Naisa-ayos at napaganda ng proyekto ang bahagi ng center islands mula sa tapat ng Our Lady Mediatrix of All Graces Cathedral hanggang sa may CAP Building ng Quezon Boulevard.
Nagmula ang pondo sa Department of Budget and Management na naglalayung gawing ‘livable at sustainable’ ang 145 na mga lungsod sa buong bansa sa pamamagitan ng pagsasaayos at tamang paggamit ng mga open spaces nito.
Abot sa tatlong bilyong piso ang itinabing pondo ng DBM para ipatupad ang nabanggit na proyekto sa buong bansa kung saan, basehan ng halagang matatanggap ng bawat lungsod ang laki ng populasyon at lawak ng lupaing sakop nito.
Tinutulungan ng Green, Green, Green program ang mga city governments na magdisenyo ng forest parks, botanical gardens, landscaping, tree planting, paglalagay ng mga ‘eco-friendly’ na mga pailaw at istraktura.
Maliban sa napapanatili nitong presko at dekalidad ang hanging nalalanghap ng mamamayan, nababawasan din nito ang mapanirang epekto ng climate change tulad na lamang ng matinding init ng sikat ng araw at pagbaha.
Sa kabila ng Covid19 pandemic ay natapos ang proyektong nabanggit ng City Government na sinimulang ipatupad noong buwan ng Setyembre 2020 at natapos nitong Disyembre na nagsilbing pangunahing atraksyon sa panahon ng nakalipas na Kapaskuhan.##(CIO/JPE/lkro)
January 12, 2021
FARMER’S MARKET NAGPAPATULOY SA KABILA NG COVID19 PANDEMIC
KIDAPAWAN CITY – ‘SUPORTA PARA SA MGA LOCAL VEGETABLE FARMERS’.
Pinananawagan ito ng City Government sa lahat ng mga Kidapawenyo sa pagpapatuloy ng Farmer’s Market sa tapat ng City Hall.
Mabibili rito ang mga dekalidad at sariwang gulay at prutas sa presyong abot kaya para sa lahat.
“ We are encouraging our local consumers to buy their vegetable sustenance here in the Farmer’s Market. Doing so will help our local vegetable producers and farmers in their livelihood in this time of the Covid19 pandemic”, wika pa ni City Agriculturist Marissa Aton.
Matatandaang sinimulang ipatupad ng City Government ang Farmer’s Market sa tapat ng gusali ng Lokal na Pamahalaan bilang tugon sa suliranin ng mga nagtatanim ng gulay sa kung papaano nila maibebenta ang kanilang produkto matapos manalasa ang Covid19 pandemic.
Ang mga ipinatupad na quarantine protocols kontra Covid19 ay nagresulta sa limitadong oportunidad na maibenta ang mga gulay sa ibang mga pamilihan, bagay na naka-apekto ng malaki sa kabuhayan ng mga nagbebenta nito.
Dahil dito, binili ng City Government ang mga benta ng vegetable growers and producers at ipinagbibili sa pubiko magpasahanggang kasalukuyan sa Farmer’s Market.
Nagsimulang ibenta ng mga magsasaka ang kanilang produkto noong Abril 2020 kung saan ay inilagay ni Mayor Joseph Evangelista sa community quarantine ang lungsod.
Maliban sa natutulungan nito na magkaroon ng hanapbuhay ang mga magsasaka, ay nakatugon din ito sa seguridad sa masusustansyang pagkain ng mamamayan dahil ibinebenta ang mga produktong gulay at prutas sa abot kayang halaga.
Ipinaseguro noon ni Mayor Evangelista na may angkop na supply ng pagkain ang taga Kidapawan City dahil na rin sa walang kaseguruhan kung kalian magtatagal ang problemang dala ng Covid19 pandemic.
Bukas ang Farmer’s Market mula 8am-5pm Lunes hanggang Biyernes para sa lahat ng mga nagnanais makabili ng sariwang gulay at prutas, ayon pa sa City Agriculture Office. ##(CIO/JPE/kro)
PHOTOS AND VIDEOS SEE MORE PHOTOS | SEE MORE VIDEOS
