Category: Press Release

KIDAPAWAN CITY (Marso 13, 2023) – INILAHAD ng Kidapawan City Police Station o KCPS sa pangunguna ni LtCol Peter Pinalgan, Jr. ang Chief of Police ng lungsod ang mga accomplishments nila o mga napagtagumpayan ng local police para sa Calendar Year 2022.

Ito ay sa Flag-Raising Ceremony at Convocation ng City Government of Kidapawan ngayong araw na ito ng Lunes, Marso 13, 2023 na ginanap sa lobby ng City Hall kung saan naging sponsor ang KCPS.

Kabilang ang mga sumusunod na operational and administrative accomplishments ng KCPS:
Illegal drugs – 55 police operations, 45 arrests and cases filed in court; confiscated 38.602 grams of methamphetamine Hydrochloride o shabu at 33.3 grams ng marijuana; illegal gambling – 48 police operations, 99 arrests and confiscated bet money P71,899 from “tong-its”, “tari-tari”, mahjong; pagpapalakas ng No-take policy; Manhunt Charlie – 94 arrests served with Warrant of Arrest kasama na ang 24 na mga Most Wanted Person sa lungsod; Loose Firearms – 37 firearms confiscated, 4 ang naaresto kaugnay ng pagdadala ng unlicensed fireamrs, pagpapalakas ng “Oplan Katok”.

Kabilang rin sa accomplishments ang pagsasagawa ng Oplan Lambat Bitag (implementation of RA 4136) joint operation with HPG, LTO, TMEU – 3,355 motorists arrested, 2,770 issued TOP, 584 motorcycle and 1 4-wheel vehicle impounded; implementation of Ordinances – 105 motorcycles with “bora-bora” muffler confiscated at dalawa ang nasampahan ng kaso; pagpapalakas ng “Kasimbayanan” na naglalayong paigtingin pa ang mabuting relasyon ng local police, simbahan, at buong pamayanan. Sa ilalim ng “Kasimbayanan” ay nakapagsagawa ang KCPS ng 72 drug symposium na nilahukan ng 3,600 elementary pupils at 2,600 Senior High School students.

Pasok din sa accomplishment ng local police and Kabataan Kontra Droga at Terorismo o KKDAT) kung saan nakapagsagawa ng 17 activities at abot sa 3,068 kabataan ang lumahok mula sa mga paaralan at mga barangay. Mula din sa lungsod ang nahalal na KKDAT Regional President at ito ay si Ryan Quinto; BPAT enhancement training na abot sa 32 ang nagawang pagsasanay; 50 tree planting activities, 25 clean-up drives, 15 gift-giving activities, 75 lectures para sa CATA, GAD, VAWC at iba pang batas; at pagbibigay ng libreng police clearance sa 150 indibidwal.

Dagdag pa rito ang lingguhang pagsasagawa ng Enhanced Revitalized PNP Internal Cleansing Strategy; Information and Education campaign kasama na ang “Oplan Yawyaw” o recorida kung saan abot sa 435,987 IEC materials ang naipamahagi at 1,680 ang naisagawang recorida; muling pagtatatag ng 4 na Police Community Precincts sakop ang 10 barangay sa lungsod; pagpapalakas ng police visibility at ugnayan sa mga barangay officials, BPAT at iba pang force multipliers; pagsasaayos ng mga Police Boxes, at pagtatayo rin ng male barracks sa loob ng KCPS.

Nakamit naman ng KCPS ang mga sumusunod na awards dahil sa mahusay na performance sa CY 2022: Best Component City Police Station, Rank 1 for the most number of arrested Most Wanted Persons; Rank 1 QUAD accomplishments; Rank 1 in Unit Performance rating (Provincial Level and Regional Level); Rank 2 in operational accomplishments on illegal gambling; rank 3 in operational accomplishment campaign against loose firearms.

Kaugnay nito, pinasalamatan ni City Mayor Atty. Jose Paolo Evangelista si LtCol Pinalgan at ang buong KCPS sa patuloy na pagganap ng kanilang tungkulin at sa pagpapanatili ng kaayusan at kapayapaan sa lungsod.

Malugod namang sinabi ni LtCol Pinalgan na patuloy lang ang local police sa ilalim ng kanyang pamumuno at sa abot ng kanilang makakaya ay paglingkuran ang mamamayan at iligtas ang mamamayan laban sa banta ng karahasan o kaguluhan. (CIO)

KIDAPAWAN CITY (Marso 8, 2023) – TUMATAK sa puso’t-isipan hindi lamang ng mga kababaihan ngunit pati na sa mga kalalakihan ang isang espesyal na aktibidad na ginawa sa watershed area sa Barangay Perez, Kidapawan City sa mismong pagdiriwang ng International Women’s Day ngayong araw na ito ng Miyerkules, Marso 8, 2023.
Ito ay ang Tree Planting Activity na isa sa mga highlights ng National Women’s Month ngayong Marso at ng March 8 bilang International Women’s Day sa pangunguna ng City Social Welfare and Development Office o CSWDO at sa pakikipagtulungan ng Metro Kidapawan Water District o MKWD.
Isang Strict Protection Zone ang naturang lugar na kung saan ay matatagpuan ang malalaking punong kahoy at iba’t-ibang uri ng tanim o endemic trees and plants na pinangangalagaan ng MKWD at siya namang pinagkukunan ng supply ng tubig para sa mga mamamayan ng lungsod.
Abot sa 7,000 seedlings na kinabibilangan ng Sagimsim, Lawaan, Tinikaran, at White Nato ang mga itinanim ng mga partisipante na nagmula sa government, non-government, people’s organizations, civic organizations, business, academe, barangay, IP, solo parents, OFW at ibang organisasyon na may nagkakaisang hangarin makapagtanim ng punong-kahoy at makatulong sa pangangalaga ng kalikasan.
May apat na lugar na pinagtamnan ang mga lumahok sa tree planting at ito ay ang Site 1 kung saan nagtanim ang City Mayor’s Office, City Admin Office, Provincial Environment and Natural Resources Office o PENRO at ang Kidapawan City Police Station o KCPS; Site 2 kung saan lahat ng mga women’s groups ay sama-samang nagtanim; Site 3 na lugar naman para sa mga personnel at workers ng LGU Kidapawan; at Site 4 na lugar o planting site na inilaan para sa mismong personnel ng MKWD.
Samantala, naging mahalagang bahagi naman ng programang CANOPY 25 ng City Government of Kidapawan ang naturang Tree Planting Activity na kung saan ay nakamit ang target na maitanim ang 7,000 punong-kahoy sa malaking bahagi ng watershed.
Matatandaang noong February 21, 2023 ay inilungsad ang CANOPY 25 sa Barangay Ginatilan, Kidapawan City na isa sa pinakamalaki at pinakamahalagang proyekto ni City Mayor Atty Jose Paolo Evangelista na naglalayong makapagtanim ng abot sa 2.5 milyong punong-kahoy sa ilang strategic areas sa lungsod sa loob ng isa hanggang dalawang taon upang makatulong sa environmental care and protection at mabawasan ang mga kalamidad tulad ng flashflood at landslide.
Kaugnay nito, pinasalamatan ni Mayor Evangelista ang lahat ng mga nakiisa at buong-pusong sumuporta sa Tree Planting Activity sa Barangay Perez watershed.
Umaasa ang alkalde na magtutuloy-tuloy na ang pagtatanim ng mga punong-kahoy sa mga target areas at magkakapit-bisig ang bawat sektor sa pagkamit ng 2.5 milyong punong-kahoy na siya namang magbibigay proteksiyon sa kapaligiran at magbibigay-daan sa kaligtasan ng mga susunod na henerasyon.

KIDAPAWAN CITY (Marso 7, 2023) – MAHALAGA na ang mga programang pang nutrisyon na ipinatutupad ng City Government of Kidapawan ay maging angkop sa pangangailangan ng mga mamamayan lalo na sa hanay ng kabataan sa pamamagitan ng mga Barangay Nutrition Scholars o BNS at Barangay Nutrition Council o BNC.

Kaya naman kamakailan ay nagsagawa ng isang orientation ang City Nutrition Council (CNC) para sa pagsasagawa ng Monitoring and Evaluation of Local Level Program Implementation o MELLPI Pro Tool na siyang gagamitin upang magsagawa ng evaluation/monitoring ng nutrition programs sa mga barangay at kung paano ito nakatutulong sa pagkamit ng wastong nutrisyon.

Isang evaluation team ang magsasagawa ng MELLPI Pro Tool at kinabibilangan ito ng iba’t-ibang tanggapan tulad ng City Nutrition Office, CSWDO, CAO, DILG, DepEd, CHO, CPDO, CIO, at World Vision (non-government organization) na nagtutulungan para sa maayos na pagpapatupad ng nutrition programs, ayon kay Melanie Espina, RND, ang City Nutrition Action Officer ng Kidapawan.

Kabilang naman ang mga sumusunod sa mga nutrition specific programs na ipinatutupad sa lungsod: Complementary Feeding Program, “Tutok Kainan” Program, Provision of Ready-to-use therapeutic food (RUTF) and Ready-to-use supplementary food (RUSF) Therapeutic Feeding Care.

Kasama pa dito ang Breastmilk Donation Program, Nutrition Month Celebration, School-based Feeding Program, at partnership feeding programs (OFW Federation, Liga Office of Kidapawan, Supplementary Feeding Program for Nutritionally at Risk and Teenage Pregnant Women na pawang mga nutrition specific programs din.

Pasok din sa specific programs ang Vitamin A Supplementation and Deworming, Supplementary Feeding Program for Daycare Children.

Sa kabilang dako, kabilang naman sa nutrition sensitive programs ang mga sumusunod: “Gulayan sa Tugkaran” (backyard gardening), Breastfeeding Awareness Month, “Pabasa sa Nutrisyon Program (reading materials), atKabaranggayan Dad-an og Proyekto og Serbisyo (KDAPS).

Maliban sa mga nabanggit na programang pang nutrisyon na kasalukuyang sumasailalim sa evaluation ay patuloy pa rin ang CNC sa monitoring sa mga barangay na may mga identified malnourished children, Barangay MELLPI Pro and Barangay Nutrition Council Advocacy Consultative Meeting at pagsasagawa ng trainings at iba pang aktibidad tulad ng Barangay Nutrition Scholars Congress at mga Resolutions and Ordinances ng CNC, ayon pa kay Espina.

Samantala, nitong Pebrero 21, 2023 ay sinimulan ng City Nutrition Evaluation Team (CNET) ang Search for the 2022 Outstanding Barangay Nutrition Scholar (BNS) ganundin ang Search for Most Functional Barangay Nutrition Council (BNC).

Sinusuri ng CNET ang mga BNS at BNC sa pamamagitan ng mahusay at epektibong pagpapatupad ng mga nutrition program sa pamamagitan ng mahusay na planning, organizing, advocacy, coordination, resource generation, documentation at maging record keeping at maging sa monitoring at evaluation ng mga programa.

Anim na mga barangay na ang nabisita ng CNET at ito ay kinabibilangan ng Linangkob, Kalaisan, Sumbac, Perez, San Roque at Gayola.

Lahat ng ito ay naglalayong mapalakas ang mga ipinatutupad na hakbang ng City Government of Kidapawan para sa pagtamo ng wastong nutrisyon sa pamamagitan ng CNC. (CIO-jscj//if//photos by CNC)

Malugod na tinanggap ng mga residente ng Barangay Onica ang muling pagbubukas ng KASIMBAYANAN o KAPULISAN, SIMBAHAN, at PAMAYANAN na naglalayong mapagtibay ang samahan ng ating mga kapulisan at ng publiko tungo sa progresibo at matiwasay na komunidad.

Nagsagawa ang ating mga kapulisan ng pagpupulong patungkol sa paglaban sa mga krimen, terorismo, at illegal na droga.

Nilahukan ito ng Kidapawan City Police Station sa pangunguna ni PCPT Razel C. Enriquez sa covered court ng Barangay Onica, Kidapawan City mga 9:00AM noong Pebrero 16,2023.

Nagsagawa din ng pagtuturo si PCPT Razel C. Enriquez tungkol sa Gender and Development, RA 9262(Batas Laban sa Karahasan sa Kababaihan), RA 7610(Batas na Nagproprotekta sa Pang-aabuso ng kabataan), RA 8353(Batas laban sa Panggagahasa). Matagumpay na natapos ang aktibidad sa mismong araw.

Isa sa mga espesyal na katangian at kasanayan ng mga drayber ay ang pagiging alisto at maingat nito mula sa disgraasya sa daan. Kayang-kaya nyang gumawa ng mga kalkuladong desisyon sa loob lamang ng ilang milliseconds upang maiwasan ang mga di inaasahanang pangyayari habang nagmamaneho. Ito ang dahilan kung bakit panatag ang pasahero sa mga eksperyensyadong mga drayber, subalit may mga pagkakataon na nagkakamali din sila ng tantya, lalo na at ang daan ay parang natuyong ilog. Iyan ang kalagayan ng daan sa purok 4 ng Brgy. Sto. Niño, dito sa lungsod ng Kidapawan.

Ang mga pangunahing produkto ng Purok ay kinabibilagan ng niyog at saging. Medyo abala din ang nabanggit na daan dahil ito ang syang nagsisilbing ugnayan papunta ng Sitio San Miguel at Brgy. Linangkob. Dahil sa panay na pagdaan ng mga sasakyan at ng tubig dito pababa papunta sa dalawang ilog – na madalas ding umaapaw, ay unti-unting natatangay ang mga lupa na syang sanhi ng pagsisilitawan ng mga malalaking bato. Iilan sa mga sasakyan na dumadaan dito ay nakaranas nang matumba o di naman kaya ay gumulong-gulong dahil sa kalagayan ng daan.

Matatandang nauna nang pinalagyan ng Lokal na Pamahalaan ng Kidapawan ang dalawang ilog ng Pipe Culverts noong nakalipas na buwan. At ngayon naman, bilang tugon sa problema nila sa daan ay pinalagyan ito ng concrete road na may habang 270 meters na nagkakahalaga ng P2, 921, 801. Sa wakas nga ay kumpleto na ang rehabilitsayon ng daan sa nasabing lugar. Tuluyan nang napawi ang matinding pag-aalala ng lahat na dumadaan at nakatira sa lugar sapagkat, di na kailangan pang magpaese-ese ang mga motorista upang maiwasan ang malalaking bato at di na rin mangangamba ang mga pasahero sa posibilidad na sila ay gumulong dahil sa pangit na daan.

Labis naman ang naging galak ng mga residente ng purok 4 ng brgy. Sto Niño at ng mga karatig pook na dumadaan sa nasabing daanan sa proyekto na ipinatupad ng City Governement of Kidapawan. Dahil sa kaginhawaan at katiwasayan na dala ng proyekto ng gobyerno.

KIDAPAWAN CITY (Marso 2, 2023) – NATUPAD ang pangarap ng mga guro at mag-aaral ng abot sa 29 paaralan sa Lungsod ng Kidapawan matapos na mapagkalooban sila ng mga bago at matitibay na mga upuan o armchairs na kanilang gagamitin sa loob ng classrooms.
Sa naturang bilang, 13 dito ay mga secondary o high schools at 16 ay mga primary o elementary na lubos na nangangailangan ng mga upuan para sa mga batang naka-enroll sa paaralan.
Kabilang naman sa talaan ng mga high schools na nakabiyaya ng armchairs ay ang Saniel Cruz National High School, Mt. Apo National High School – Balabag Extension, Mariano Mancera Integrated School, Amas National High School, Datu Igwas IP School, Linangkob National High School, Mt. Apo National High School, Lake Agco Integrated School, Kalaisan National High School, Spottswood National High School, Juan P. Jalipa National High School, Manongol National High School, at Lanao National Highschool.
Nakatanggap ng tig-38 bagong armchairs ang nabanggit na mga high schools.
Sa kabilang dako, ang mga sumusunod na elementarya ay nakatanggap din ng mga bagong upuan at ito ay kinabibilangan ng Lake Agco Integrated School, Sayaban Elem School, Mariano Mancera Integrated School, Bangsamoro Elem School, Mateo Elem School, Luvimin Elem School, Marbel ElemSchool, Datu Pananggom E. Andagkit Memorial Elem School, Junction Elem School, Mateo Olodin Memorial Elem School, Paco Central Elem School, San Miguel Elem School, Sikitan Elem School, Gayola Elem School, San Isidro Elem School, at Lanao Elem School.
Bawat elementary school ay nakatanggap ng tig-31 bagong armchairs.
Mula sa Special Education Fund o SEF ng City Government ang pondong ginamit sa pagpapagawa at pamamahagi ng mga upuan kung saan abot sa P1,450,000 ang total appropriation ng City Government para sa proyekto, ayon sa Office of the City Budget Officer.
Para sa mga guro, napakahalaga ang pagkakaroon ng mga bagong upuan para naman makapag-aral ng mabuti ang mga bata kung saan komportable ang mga ito sap ag-upo.
Bago raw dumating ang mga bagong armchairs sa kanilang mga classrooms, ay mga mono-block chairs at mga sirang armchairs ang gamit ng mga bata at ang pinakamatindi pa ay sa sahig na lamang umuupo at nagsusulat ang mga bata dahil sa kakulangan o kawalan ng mauupuan. Ibinahagi din nila kung saang mga classrooms napunta ang mga bagong upuan.
Sinabi ng mga guro na malaki ang epekto sa mga mag-aaral kung nahihirapan sila dahil sa kakulangan ng pasilidad tulad na lamang ng arm chair.
Tuwang -tuwa naman ang mga mag-aaral sa pagkakaroon nila ng mga bagong upuan. Lalo daw silang gaganahan sa pag-aaral dahil sa biyayang natanggap mula sa City Government of Kidapawan.
Sa huli ay pinasalamatan ng kapwa guro at mag-aaral ang City Government of Kidapawan at si Mayor Atty Jose Paolo Evangelista sa patuloy na suporta at pagbibigay ng ayuda sa mga paaralan sa lungsod tungo sa pagtamo ng kalidad na edukasyon para sa mga kabataan.
Matapos naman ang distribusyon o pamamahagi ng libreng upuan sa mga nabanggit na paaralan ay mabibigyan at mabibiyayaan din ng katulad na ayuda ang iba pang mga paaralan sa lungsod.
Para sa Luntian Kidapawan Reports, ako si Jimmy Sta Cruz ng City Information Office nag-uulat.

KIDAPAWAN CITY (Marso 1, 2023) – DALAWANG parangal ang nakamit ng Office of the City Civil Registrar ng Kidapawan sa katatapos lamang na pagdiriwang ng 33rd Civil Registration Month nitong buwan ng Pebrero.
Ito ay kinabibilangan ng Most Outstanding Local Civil Registry (1st Place) sa buong Cotabato Province kung saan tumanggap ang OCR Kidapawan ng Plaque of Recognition mula sa Philippine Statistics Authority (PSA) – Cotabato Provincial Statistical Office.
Iginawad sa OCR Kidapawan ang naturang parangal dahil na rin sa mahusay na pagpapatupad ng mandato ng tanggapan at ganundin ang mga programa ng PSA kabilang na ang free late birth, marriage, and death registration sa kasagsagan ng 33rd Civil Registration Month.
Dagdag pa rito, ay nakamit din ng OCR Kidapawan ang 1st Place sa Infographic Making Contest na nilahukan ng iba’t-ibang mga OCR sa Cotabato Province. Nasungkit ng tanggapan ang panalo dahil sa mahusay na visual presentation ng impormasyon at data sa mga stakeholders.
Iginawad ang dalawang parangal sa Closing Ceremony ng 33rd Civil Registration Month sa PSA Regional Statistical Office 12, Koronadal City nitong Pebrero 28, 2023 kung saan pormal na tinanggap ni City Civil Registrar Mercedes P. Tolentino ang plaque at certification na kapwa may lagda ni Engr. Belinda R. Penuela, Chief Statistical Specialist, PSA 12.
Kaugnay nito, sinabi ni Tolentino na nagpapasalamat ang buong OCR Kidapawan sa mga parangal na kanilang nakamit kasabay at tiniyak na magpapatuloy ang tanggapan sa pagganap ng kanilang tungkulin para sa ikabubuti ng mamamayan.
Alinsunod rin daw ito sa mandato ni City Mayor Atty. Jose Paolo Evangelista na ihatid o ibigay ang makatotohanang serbisyo publiko sa mamamayan ng lungsod, dagdag pa ni Tolentio.
Tema ng 33rd Civil Registration Month ngayong Pebrero 2023 ay “PSA @10: Providing Efficient and Effective Civil Registration and Vital Statistics through Digital Transformation”. (CIO-jscj//if)

KIDAPAWAN CITY (Pebrero 28, 2023) – MALAKING bilang nga mga business establishments sa Lungsod ng Kidapawan ang tumalima o nag-comply sa City Ordinance No. 13-940 o ang CCTV Ordinance of Kidapawan bilang isa sa pangunahing requirements upang makakuha ng business permit (new or renewal).

Nasa 80% o katumbas ng 3,143 establishments ang nabigyan ng Certificate of Compliance, 8% ang nagsumite ng Affidavit of Undertaking o nasa 307 establishments na nangakong tatapusin ang paglalagay ng CCTV cameras, at 1% o katumbas ng 4 na establishments ang nabigyan ng Provisional Certificate o mga tindahang may existing CCTV ngunit kailangan ng ayusin, ayon kay City Disaster Risk Reduction and Management Office Head Psalmer Bernalte.

Samantala, ang nalalabing 12% o abot sa 463 establishments ay nasa proseso pa rin ng pagtalima sa nabanggit na ordinansa, ayon pa rin kay Bernalte, na siya ring Head ng Public Safety Office.

Ang nabanggit na mga breakdown ay mula sa kabuoang 3,917 na mga establisimiyento na nabigyan ng business permits ng Business Processing and Licensing Unit o BPLO matapos ang pagsasagawa ng Electronic Business-One-Stop-Shop o Electronic BOSS nitong Enero 2023.

Abot naman sa 3,637 ang mga renewals of business permit habang 280 ay mga new business permit o total na 3,917 para sa Fiscal Year 2023, dagdag pa ng BPLO.

Kaugnay nito, muling ipinaalala ng City Government of Kidapawan sa pangunguna ni City Mayor Atty Jose Paolo Evangelista ang kahalagahan ng paglalagay ng CCTV cameras sa bawat establisimiyento bilang bahagi ng security and safety measures.

Alinsunod sa Ordinance No. 13-940, ang mga CCTV cameras ay ilalagay sa lahat ng mga enterprises sa lungsod maging ito man ay large, medium o small scale. Dapat ding mga high end at high definition CCTV cameras ang ilalagay nila para matiyak na magagamit ito ng lubos laban sa kriminalidad.

Makakatulong ito ng malaki sa pag-review ng mga kuha ng CCTV lalo na sa insidente ng krimen o emergency situations, ayon pa sa alkalde kung kaya’t hinikayat niya ang business sector na suportahan at makiisa sa layunin ng City Government na manatiling ligtas ang mga mamamayan ng lungsod sa pamamagitan ng paglalagay ng mga CCTV cameras sa mga establisimiyento. (CIO//if)

KIDAPAWAN CITY (Pebrero 27, 2023) – SA Flag raising-ceremony at employees convocation na ginanap sa City Hall lobby ngayong umaga ng Lunes, Pebrero 27, 2023 ay inihayag ng Kidapawan City Jail District ang mga achievements ng tanggapan nitong nakalipas na 2022 hanggang sa kasalukuyan.Si JCINSP Teddy G. Uchi, Jail Warden ng KCDJ na nanguna sa Panunumpa ng Lingkod Bayan ay nanguna rin sa pagbibigay ng mga nakamit ng tanggapan sa pamamagitan ni JO1 Amfrechine V. Namuag na siyang bumasa ng jail matters and updates kabilang ang mga sumusunod: Provision of basic needs kung saan napapagkalooban ng pagkain ng tatlong beses bawat araw ang mga Persons Deprived of Liberty o PDL; Health Services kabilang ang paggamot sa karamdaman ng mga PDL kasabay ang regular monitoring ng kalusugan at pagpapainit sa araw ganundin ang ehersisyo; Educational Program kung saan binibigyan ng edukasyon ang mga PDL (elementary to senior high school) sa pamamagitan ng Alternative Learning System o ALS, at Technical Education and Skills Development Authority o TESDA scholarship.Kabilang din sa mga naibigay ng pamunuan ng KCDJ sa kanilang mga PDL ay Skills Training and Enhancement Program katuwang ang ilang ahensiya ng pamahalaan, Livelihood Program kung saan kumikita ang mga PDL sa pamamagitan ng paglikha ng mga souvenir items, floor mat, pot holders, at iba pa; Interfaith Program na nagbibigay ng pagkakataon sa kanila na maipahayag ang pananampalataya o paniniwala.Pasok din sa achievements ng KCDJ ang Cultural and Sports Program na nagsusulong ng sportsmanship and camaraderie ang paggalang sa kultura ng bawat isa; Paralegal Program na nagbibigay ng pag-asa at pagkakataon sa mga PDL na mapa-aga ang kanilang paglaya sa pamamagitan ng iba’-t-ibang legal na pamamaraan; at ang E-Dalaw Service kung saan may pagkakataon ang PDL at kanyang pamilya na magkita o magkausap online lalo pa kung hindi agad makakadalaw ang pamilya.Sa kanyang mensahe, pinasalamatan ni City Mayor Atty Jose Paolo Evangelista ang pamunuan ng KCDJ sa pangunguna ni JCINSP Uchi sa patuloy na pagpapatupad ng mga programa sa pasilidad at pagsusulong ng mga hakbang na ikabubuti ng mga PDL.Sinabi ni Mayor Evangelista na sa kabila ng kanilang kapalaran kung saan nakasadlak sila sa bilangguan ay may dignidad at karapatan pa rin sila bilang mga tao at maaari pang magbagong buhay kung kaya’t patuloy ang kanyang liderato sa suporta sa mga programa ng KCDJ. (CIO-jscj//if//dv)

Isa sa pangunahing pinangangambahan ng mga motorista sa tuwing tag-ulan maliban sa pagkabasa ay ang maputik at madulas na daan, lalo na at kapag ito ay may malalalim na mga bahagi na parang mga munting lawa, dahil sa mga bakas na naiwan ng mga malalaking sasakyan. Madalas na nadudulas o di kaya naman ay nababalahaw ang mga sasakyan dahil sa tindi ng putik sa daan na dala ng ulan. Ilan lamang ito sa mga hinaharap ng mga taga purok 6 ng barangay San Isidro noon subalit wala nang ganitong paghihirap ng mga taong bayan ngayon dahil tapos na ang pagsasaayos ng naturang daan.

Ang daan sa nasabing barangay ay nagsisilbing daanan ng mga malalaking sasakyan na may dala-dalang mga produkto mula sa mga karatig barangay nito na kinabibilangan ng barangay Katipunan, Sikitan at Gayola. Ang mga pangunahing produkto na madalas dinadaan sa nasabing barangay ay ang troso, goma, saging, tubo, kopras, at palay – mga produkto na kadalasan ay ibinabyahe gamit ang malalaking truck.

Ang inilagay na concrete road ay may habang isang daan at animnapung metro o 160 meters na nagkakahalaga ng abot sa P1, 997, 712. Nang simulan ng lokal na pamahalaan ng Kidapawan ang proyekto sa lugar ay matindi ang pasasalamat ng kapwa mga residente at mga motorista dahil sa matutugunan na ang tatlo sa kanilang mga pangunahing suliranin. Una, ay maiiwasan na ang pagkadulas o pagkabalahaw ng kanilang mga sasakyan. Pangalawa, mas maayos na ang daloy ng kalakaran sa naturang barangay; at pangatlo ay mas panatag na ang loob ng mga residente sa tabi ng daan dahil sa hindi na maalikabok ang kanilang harapan sa tuwing may dumadaan.

Dagdag pa dito ay malaki ang pasasalamat ng mga residente sa ginawang insyatiba ng City Government of Kidapawan sa pamumuno ni Mayor Jose Paolo M. Evangelista sa pagtuon nito ng pansin sa kondisyon ng mga daanan sa mga liblib na pook ng lungsod.